Shillong, Jylliew 25:
U Myntri ba dei khmih ïa ka tnad pule puthi ka Jylla, u Rakkam A. Sangma u la pyntip ba ka Sorkar ka dang ïai ap ïa u Lat ka Jylla ba un ai ka jingmynjur ïa ka Williamson Sangma Technical University (Amendment) Bill, 2023 na ka bynta ban tei ïa ka skulbah ka Jylla.
U Rakkam da ka jingkyrmen ban sdang noh ïa ka jinghikai na ka bynta u snem 2024-2025, u la ong ba ka Sorkar Jylla mar syn ïoh ïa ka jingmynjur na u Lat, kan ïaid shakhmat ha ka ban thung ïa baroh ki nonghikai.
“Ka State Assembly Bill kaba nyngkong la wanrah hapoh ka ïingdorbar thawaiñ hynrei ngi dang ïai ap ïa ka jingmynjur na u Lat,” la ong u Sangma.
“Ka jingpyntreikam ka la long kaba ïaid beit bad ngi kyrmen lada ki kam ki ïaid beit, naduh ka samoi ai jinghikai ka ban sa wan kaba mut naduh u 2024, ngi la khmih lynti ban sdang ïa ka samoi ai jinghikai bad na ka bynta kane ka skulbah jong ka Jylla, ka jingmynjur na u Lat ka dang ïai ap,” u la bynrap.
Ka Sorkar ka dang pynkhreh ban sdang noh ïa ka ‘Post Graduate Course’ naduh ka sngi ba katei ka jaka pule kan sdang ïa ka jingpynlong ïa ki jingai jinghikai.
“Mar syn ïoh ka jingmynjur na u Lat, ngin pynkhreh ban ïaid shakhmat ha ka jingthung ïa baroh ki nonghikai, khnang ba ka jingsdang ïa ka samoi hikai, kata wat la kan long shuwa tang ïa ka ‘Post Graduate’, ngin lah ban sdang. Ngi la pynkhreh ban sdang noh shuwa tang ïa ka ‘Post Graduate Course’ na ka bynta ka samoi hikai ka ban sa wan,” la ong utei u Myntri.
