Shillong, Jylliew 25:
Ka tnad pule-puthi lyngba ka State Education Mission Authority of Meghalaya (SEMAM) ka dang ïaid shakhmat ha ka ban thung shuh ïa ki nonghikai ba kyrpang ne ki ‘Special Educator’ (SE) khnang ba ki khynnah kiba don jingduna ha ki dkhot met kin ïoh ïa ka pule-puthi kaba paka.
“Ngi dang ïaid shakhmat bad ka kam ban kyntiew shuh ïa ka jingdon jong ki nonghikai ba kyrpang,” la ong u State Project Director ka SEMAM, u Swapnil Tembe haba kren bad u nongthoh khubor.
Halor kane, u la ïathuh ba donkam ïa ki briew kiba la pyntbit ïa ka jingpule ba kyrpang hynrei kumba ka long, ka kham jynjar ban ïoh ïa kiba kum kine ki briew hapoh ka Jylla.
Haba kdew ba lada i donkam, ka tnad ka lah ruh ban wanrah da kiba nabar, u la ong ba ka jingthung ïa ki nonghikai kyrpang kan long ha la ka jong ka jong ka kylla.
Ki nonghikai kyrpang ha kane ka liang ki dei ban long kiba la ithuh da ka Rehabilitation Council of India (RCI) bad kiba la pyndep ïa ki jingpule halor ki jingduna dkhot met.
Kine ki nonghikai ki ju trei bha ha ki skul ba kyrpang hynrei hadien ba wan ka SSA, la pynïadon bynta ïa ki bad ka SSA kum ki ‘Resource Teacher’ ha ki klas rit. Hadien ka jingwan jong ka RTE pat, la pynkylla kyrteng noh ïa ki sha ki ‘Block Resource Person on Inclusive Education’ (BRPIE) bad la buh ïa 2 ngut ha man la kawei-kawei ka Block.
Kumba ka long mynta, ki don 92 ngut ki BRPIE ha 46 tylli ki Block.
Haba phai sha ka Inclusive Education for the Disabled at the Secondary Stage (IEDSS) naduh IX-XII, ki don 16 ngut ki nonghikai ba kyrpang (SE) ha ki distrik bapher-bapher bad kine ki leit sha ki skul ban ïarap bad ai jingkyrshan ïa ki nonghikai bad khynnah jong ki skul Sorkar, skul shimet bad skul ba kyrshan da ka Sorkar.
Nalor ki 92 ngut ki BRPIE bad 16 ngut ki nonghikai ba kyrpang (SE), ki don ruh sa 48 ngut ki ‘Inclusive Education Volunteer’ (IEV) kiba ïarap ha ka liang ban wad jingtip, ai jinghikai ïa kito kiba duna ha ki dkhot met ha ki ïing ki sem, ban ïarap pynïoh ïa ki UDID, ki skhim u Myntri Rangbah na bynta kiba duna dkhot met bad kiwei-kiwei.
Kumta ka tnad ka ban jur halor ka jingdonkam ïa ki SE khnang ba ki khynnah kiba don jingduna ha ki dkhot met kin ïoh ïa ka pule-puthi kaba paka kumjuh ba ka jingpule jong ki kan ym sangeh noh shiteng por.
Katkum ka jinglum jingkheiñ jong ka tnad na bynta u snem 2023-24, ka Jylla ka la ithuh 6001ngut ki khynnah kiba don jingduna ha ki dkhot met bad kine ki kynthup ïa 367 ngut kiba don ha ka kyrdan pule ‘Pre-Primary’, 2930 ngut ha ka ‘Elementary’, 198 ngut ha ka ‘Secondary’, 673 ngut ha ka ‘School Readiness Programme’ (kiba dang bteng ïa ka jingpule ha ïing hynrei kiba la bit ban pynïasoh noh sha ki skul) bad 1398 ngut ha ka ‘Home School’.
Nalor kitei, ki don ruh 435 ngut ki bym pat ju leit skul ne kiba la leit teng bad pep noh shiteng por (Out of School Children-OoSC) bad ka thong jong ka tnad ka long ban wanrah biang ïa ki sha ka pule-puthi ha ki skul.
