Shillong, Jylliew 25:
U Myntri ka tnad pule puthi ka Jylla, u Rakkam A. Sangma u la ong ba ka jingjied ïa ki dkhot ki ban mihkhmat ïa ka Megha-laya State Education Commission (MSEC) ka la don mynta ha ka rai kaba khatduh bad ka Sorkar kan sa pynbna ïa ki kyrteng jong kitei ki dkhot ha ki ar-taïew ban wan.
Haba kren sha ki katto-katne ngut ki lad pathai khubor, u Rakkam u la ïai ban halor ka jingdonkam ban pyntikna ba ka Commission ka dei ban long kaba pura ka ban treikam bad ka ban peit ha baroh ki liang jong ka pule-puthi ban don.
“Ka don mynta ha ka rai kaba khatduh bad ha ki ar taïew yn sa pynbna,” la ong utei u Myntri.
U la ong ba ka kynhun wad bniah ka la jan dep ïa katei kam bad mar syn dep ka jingshong jingïalang kaba khatduh, yn sa lah ban ïohi ïa ka dur kaba shai.
U Rakkam u la bynrap ruh da kaba ong ba baroh ki dkhot jong ka State Education Commission kin dei napoh ka Jylla.
Ka Sorkar jylla ka la thaw da ka Meghalaya State Education Commission (MSEC) na ka bynta ban wanrah ïa ki jubab kiba khlaiñ bad ki jingïaleh ban ai jingmut na ka bynta ban kyntiew ïa ka pule ka puthi hapoh ka Jylla.
