Tura, Jylliew 25:
U nongïalam ki samla ka seng TMC, u Richard Marak, ha ka Sngi Sait-jaiñ u la ong ba donkam da ka jingtohkit kaba bniah ban leh da ka kynhun jong ka Sorkar Pdeng ha kaba ïadei bad ka jingtwa ka kynroh jong ka PA Sangma Integrated Sports Complex khnang ban lap lut ïa ki jingshisha.
“Hadien ba la peit ïa ki jingkren jong ka MP, ka Agatha Sangma, bad u Myntri Rangbah, u Conrad K Sangma, ka paw shai ba ka don ka jingïapher. Katba ka MP ka la kdew ba ïa ki kontraktor dei ban weng kyrteng syndon na ka daw jong ka jingtrei torti bad ba ka sorkar ka dei ban leh tyngeh pyrshah ïa ki, u Myntri Rangbah pat u ngeit ba ka jingsahkut ki nala ka dei ka daw ba la pynkhyllem ïa ka kynroh bad ba kam shym la don ka jingleh bakla ha ka jingpyntrei ïa ka kynroh,” la ong u Richard ha u kyrwoh khubor.
U la kylli ba balei u Myntri Rangbah bad ka sorkar MDA ki long kum ki nongshah kynnoh sniew man la ka por.
“Na ka daw jong ka jingïapher hapdeng ka jingkren jong ka Agatha bad u Conrad, kan bha ban buh da ka jingtohkit kaba laitluid ban leh da ka kynhun jong ka Sorkar Pdeng khnang ban lap lut ïa ki jingshisha ha kaba ïadei bad ka jingshna ïa ka PA Sangma Stadium. Ka long kaba donkam ban tih bniah bad ban lap ïa ki jingshisha khnang ba yn lah ban pynshitom bad ban ïada na kiba kum kine ki jingjia hadien habud,” la bynrap u Richard.
Shuh shuh u la ong ba ka long ka kam kaba khia ba ka sorkar ka la shah kynnoh ba ka donkti ha ki kam bamsap, ka jingbym don ki lad ban peitngor ïa ka jingpyntrei ïa ki jingtei bad kine ki lah ban dei ki daw jong ka jingkhyllem noh ka kynroh.
