Shillong, Jylliew 25:
Ka kynhun ki nonghikai SSA ha ka Sngi Thohdieng ki la leit ban ïakynduh bad aiti da ka dorkhas ha u Myntri ka tnad pule puthi ka Jylla, u Rakkam A. Sangma halor ka jingdawa ban pynskhem noh ïa ka kam jong ki.
Haba kren sha katto-katne ki lad pathai khubor, u Rakkam u la ong ba ka jingpynskhem ïa palat 12,000 ngut ki nonghikai SSA hapoh ka Jylla ka long palat ïa ka jinglah bad ka jingkot bor jong ka Sorkar Jylla.
U Rakkam u la ong ka don ka jingai jingmut ha kaba ïadei bad ka mang tyngka kaba heh hynrei na ka liang ka Sorkar kam pat kot bor ban leh ne pyntreikam ïa kata.
“Ki kynhun jong ki nonghikai SSA ki la wan ban ïakynduh ïa nga mynta ka sngi bad ki pynsngew ïa ki jingeh jong ki bad ki la dawa ban pynskhem ïa ka kam ka jong ki. Ka Sorkar ka dang khmih bniah halor kane hynrei ka jingpynskhem kam ïa palat 12,000 ngut ki nonghikai SSA ka long palat ïa ka jinglah bad ka jingkot bor jong ka Sorkar Jylla namar ki don shibun bah ki jinglut jingsep,” la ong utei u Myntri.
Shuh shuh u Rakkam u la ong ba ka Sorkar Jylla kan ïaleh beit ban wad ki lad ki lynti ban kyrshan ïa ki nonghikai SSA hapoh ka Jylla bad u la ong ba na ka por sha ka por ïa ki jingeh jong ki nonghikai la khmih bad ïakren.
“Kan sa don ka jingkit ram kaba khraw ïa ka Sorkar Jylla, kumta ngi khlem shong kli-kti, ngin ïaleh katba lah khlem shongthait ban trei na ka bynta ka bit ka biang jong ki nonghikai jong ngi,” la ong u Rakkam.
