Shillong, Jylliew 25:
Ha kawei ka jingjia kaba wanrah jingsyier biang ïa ki paidbah ka thaiñ khappud bad ka Bangladesh ha thaiñ Dawki, ki shipai BSF ki la siat bun kuli sha suiñ hadien ba ki paidbah ki la wan ïalum hajan ka ktem jong ki kaba don ha Lad Umsyiem hadien ba 4 ngut ki shipai BSF kiba la buaid kyiad ki la khie waleng bad shoh pynmynsaw ïa ki ’riew paidbah.
Kane ka la jia ha ka por 9.30 baje ei ei ha ka miet sngi U Blei ha Lad Umsyiem kaba hap ha Pynursla Civil Sub Division, East Khasi Hills district.
Katkum ka khubor ba la ïohlum, la ïathuh ba saw ngut ki shipai BSF kiba don ha ka ktem ha Lad Umsyiem ha surokbah Shillong-Dawki kiba la buaid kyiad ki la sdang ban pynkulmar ïa ki briew kiba ïaid lynti bad talasi ïa ki kali kiba don ha surok da kaba pan ïa ki kot ki sla.
La ong ba ha kane ka jingjia khie waleng kine ki shipai BSF shoh khawiang, ki la bom la tied da ki lathi ïa ki paidbah, bad uwei na ki samla uba la tip kyrteng kum u Jeffrey Pohdweng (26 snem ka rta) na ka shnong Ïiarbamon, u la mynsaw ha ka bynta jong ka khlieh namar u la shahtied ha uwei na ki shipai BSF uba la buaid kyiad.
Hadien ba ki paidbah ki la ïoh jingtip shaphang kane, ki la wan poi sha katei ka jaka bad da ka jingbitar ïa kine ki shipai BSF, ka la don ka jingkawang maw ïa ka ktem kine ki shipai BSF ha Lad Umsyiem.
Ynda ki paidbah ki la poi kham bun ha katei ka jaka, ki shipai BSF ki la siat bunsien sha suiñ ban pynpra ïa ki paidbah, katba ïa kita ki saw ngut ki shipai buaid kyiad, la set shapoh ka ktem.
Haba ïakren bad u Rangbah Shnong ka shnong Kongwang, u la ïathuh ba na ka liang ki nongkitkam shnong na Umsyiem, Kongwang, Ïiarbamon, Sohlong ki la poi lang sha katei ka jaka ban ïakren bad ki shipai BSF, ha kaba la wan mih u Commandant jong ki, uba la kular ban leh ei ei ïa kita ki shipai buaid kiba shoh briew. U la ong ba ki don ruh ki rangbah kiba la wan lang na Dawki.
Tat haduh ba thoh ïa kane ka khubor, na ka liang ki pulit ka Thanat Pynursla ruh kim pat poi wat haba ka por ka la dap 12 baje shiteng synïa
Ki paidbah ruh ki la ïalum beit ha katei ka jaka ban ap ïa ki pulit kiba dang wan na Thanat Pynursla.
