Shillong, Jylliew 25:
U samla Dines Mynsong uba long u Vice-President ka Hynñiewtrep National Youth Movement (HNYM) Mawjem Unit u la suba jur ba kito kiba mait ïa u na ryndang da ka wait ha shnong Mawblei ki lah ban dei kiba dih drok kat haduh ba kim salia shuh ïa ka jingim briew.
U samla Mynsong, 25 snem ka rta, u la shah mait da ka wait ha arngut ki briew katba ki dang ïaid lynti ha Mawblei ban leit phai sha Laitkor. Kane ka la jia ha ka por 9 baje mynmiet jong ka 24 tarik mynta u bnai katba u dang wanphai na ka jingbylla.
Hadien ba la shah wait da ka wait na ryndang bad mynsaw jur ka ngap u la kyllon ha madan. Mar kumta u la pyntip noh sha u President ka HNYM, Bah Louis Dohtdong ban ïoh leit rah sha Civil Hospital Shillong. Ha ka sngi kaba bud ha ka por mynstep la pynkynriah noh ïa utei u rangbah sha NEIGRIHMS Hospital.
U samla Mynsong u la ïathuh ba ki briew kiba la pynmynsaw ïa u ki don ar ngut namar uwei u la kam ba u dei u Nepali bad uwei u dei u Khasi. Une u Khasi u la sei da ka wait ban mait ïa u, katba u Nepali pat u la ïashoh bad uwei u paralok jong u uba wan lang na ka jingbylla.
Nangta, u la ïathuh ha ka Sngi Saitjaiñ katba u dang wan bylla na Umpling bad hiar na Nongthymmai ban ïaid da ka kjat ban leit sha Laitkor, hynrei haba ki la poi sha Mawblei hajan State Bank of India ki la shah dung ha kitei ar ngut.
U la ïathuh ba donbok ba lap poi noh ar ngut ki briew na katei ka shnong ba kitei arngut kin sa pyllait noh.
Kumta u la kyntu ïa ki para samla ba kin da husiar ban ïaid ha ka por mynmiet sha kitei ki thaiñ Mawblei khnang ban lait na ka jingmynsaw khamtam lada don kiba dik drok.
Na ka liang u President ka Hynñiewtrep National Youth Movement (HNYM), Bah Louis Dohtdong u la ong lada ka seng kan ïoh kem ïa utei u khyllah jait uba donkti ban mait ïa u dkhot ka seng, kata ïa u samla Dines Mynsong kaba la jia ha ka miet jong ka 24 tarik mynta u bnai ha Mawblei ym tip shuh aïu kan jia.
Namar kata, u la kyntu ïa ki pulit ba kin kem mardor ïa utei u khyllah jait uba kam ba u dei u Nepali namar lada ïoh kem ka seng aïu kan jia.
Nalor kane, u Bah Louis u la ong ba ka seng nangne shakhmat kan ïakhun ruh ïa une u drok namar uba la jyllei hapoh ka jylla bad ktah ïa ka imlang ka sahlang. U la ong ruh kum ka seng kam kwah ba ka jylla kan long kum kiwei ki jylla kiba la jyllei u drok bad kim salia shuh ban shim ïa ka jingim jong ki briew.
Shuh shuh u la ong ba ka jingïalang paralok ki khynnah Khasi bad ki bar jylla ka la pynlong ïa ki bar jylla ba kin sngew heh mynsiem ban khaïi ïa u drok hapoh ka jylla.
Kumta u la kyntu ïa ka sorkar ba ka dei ban pynduh noh ïa kato ka jingai jingïarap ïa kiba kyrni dih drok namar katba dang ai jingïarap ki dang bun kiba leh ïa kane ka kam.
