Nongstoiñ, Jylliew 25:
Ha ka step Sngi Saitjaiñ jong ka taïew ba la dep, katto-katne ki nongshong shnong ka thaiñ Urkali, West Khasi Hills katba kiba dang thmu ban leit sha lyngkha, ki la lap bad ïohi ïa ka met jong uwei u briew kaba la per ha sla um ha kawei na ki jaka den um lane ka ‘Check Dam’ kaba ha ka Wah Umkylliañ kaba dang hap hapoh ka shnong Urkali.
Na ka liang ki nongshong shnong ki la ïathuh ba hadien ba ki la ïohi ïa katei ka met kaba la per ha sla um ha katei ka jaka ki la pyntip noh sha ki nongïalam shnong ka Urkali. Na ka liang ki nongïalam shnong ruh mar-mar ki la pyntip noh sha thanat Nongstoiñ.
Kumta na ka liang ki pulit mar ïa ïoh jingtip ki la leit mar-mar sha katei ka jaka ha kaba ki la lap ïa katei ka met.
Ka tyllong khubor na ki pulit ka ïathuh ba hadien ba la peit bha, la shem ba katei ka met ka dei pynban jong u rangbah ba la tip kyrteng kum u Starsis Langrin (34 snem ka rta) na ka shnong Shallang Sohbar, West Khasi Hills uba la phet na Nongstoiñ Civil Hospital Nongstoiñ ha ka 21 tarik u Jylliew, 2023 hadien ba la wan buh da ki bahaïing ban phah sumar.
Shuh shuh ka khubor na ki pulit ka ong ruh ba hadien ba ki la leit sha katei ka jaka, la pynkit noh ïa katei ka met ïap sha Civil Hospital Nongstoiñ ban pyndep ïa ka ‘Post Mortem’. Tat haduh ba pynmih ïa kane khubor ym pat tip kaei ka daw kaba la pynlong ïa utei u rangbah ba un leit poi sha katei ka jaka haduh ba un da duh noh ïa la ka jong ka jingim.
