Shillong, Jylliew 25:
Ka puron jong ka phlim ‘Khohwah Nongsor’ ka Sanmilian Mawrie ka la pynpaw ba naduh dangrit ka shait kwah ak phlim bad u Pyllaitmitre Lypon kaba baroh baroh ki tip kum u Sam bad mynta ka la urlong haba ka la ïoh ban ak ha ka phlim ‘Khohwah Nongsor’.
Ka Sanmilian ka la pyntip ruh ba ïa kane ka phlim yn sa sdang pyni noh sha ki paidbah ha Bijou Cinema Shillong naduh ka 30 tarik Jylliew 2023 man ka sngi naduh ka por 11:30 mynstep, 2:00 baje nohphai sngi, 5:00 baje janmiet bad 7:00 baje mynmiet.
Ka la pynpaw ba kane ka phlim kan sa long kaba itynnad namar kawei ka jingrwai (Da Ki Sur) ka la poi arphew saw lak ngut kiba peit ha YouTube bad kane kawei ka jingrwai kaba dang shu pyllait mynta saw taïew ka la poi palat phra lak ngut kiba peit ha Youtube Chwa Syiemlieh Production kaba la ak lang bad u Sam ba la rwai da u Ram Suchiang.
Shuh shuh ka Sanmilian ka la pynpaw ba naduh nyngkong ka don ka jingkyiuh haba ka ïoh ban ak bad u Sam khamtam kato ka jingrwai ‘Shiteng Lynti’ namar u dei (Sam) uba la slem ha ki kam ak phlim hynrei ka long kaba sngewtynnad namar u long u briew uba biang bha.
Nalor kane, ka la ïathuh ba ha kane ka phlim ka la ïoh ban ak lang bad u Arman Disiar kaba ka ïakynduh nyngkong ha ka jingrwai ‘Nga Pyrkhat’ kaba la ïaid bun millian ngut kiba la peit ha Youtube.
Nangta, ka la batai ruh ba ka jingmut jong kane ka phlim ka dei shaphang ki samla pule kiba wan na nongkyndong kiba teng-teng ki bud tynneng ïa ka riam nongwei haba ki wan pule sha sor.
