T. 8 lak ai ka Sorkar sha ka longïing ba duh noh ïa 2 ngut ki heprit 

Nongstoiñ, Jylliew 25:

Ka Sorkar Jylla lyngba ki bor distrik ka West Khasi Hills ka la ai T.8 lak sha ka longïing kaba la duh noh ïa 2 ngut ki heprit ha ka shnong Mawlangniang, West Khasi Hills na ka jingshah tap khyndew ha ka step 17 tarik u Jylliew 2023.

Katei ka jingai ka la wan lyngba ka State Disaster Relief Fund (SDRF).                              

Ïa katei ka pisa la phah lyngba ka ‘Account’ sha katei ka longïing, hynrei kum ka jingsngewlem u Deputy Commissioner ka West Khasi Hills u Bah Garod L.S.N. Dykes ha ryngkat u MLA/MDC ka Nongstoiñ, Bah Gabriel Wahlang ha ka Sngi Saitjaiñ jong ka taïew ba la dep ki la leit ban ïakynduh ïa ka longïing jong kitei ki heprit ha ka shnong Mawlangniang ha ka jingdonlang u Rev. J.T. Khardewsaw, Pastor In-charge ka Mawlieh District, Tymmenbasan B. Jyrwa, Chairman ka Mawlieh District, ki nongsharai ka Balang Presbyterian, Mawlangniang, ki bahaïing hasem katei ka longïing bad kiwei-kiwei.

Kum ban shu pynkynmaw hangne, ki 2 ngut ki heprit kiba dei shipara, i Cafinia Nongsiej iba dei ruh i dkhot ka kynhun rwai ka ‘Kid’s Tarari Choir ‘lem bad i para, i Maïanylla Nongsiej ki la khlad noh hadien ka jingjia shah tap khyndew kaba la jia ha ka step jong ka 17 tarik u bnai Jylliew, 2023 ha Pyndengrei.

La pyndep ïa ka jingleit ontep donburom ïa kitei 2 ngut ha ka 19 tarik u Jylliew, 2023 ha u Lum jingtep ka Balang Presbyterian, Mawlangniang.