Shillong, Jylliew 26:
Ka Khun Hynñiewtrep National Awakening Movement (KHNAM) ka la buh jingkylli ïa ka Sorkar Jylla halor ka jingshah jem jong ka haba ïadei bad ki kam leh donbor bad kam pyntriem jong ki shipai BSF, bad ka la dawa ban don da ka Inquiry Commission halor baroh ki jingleh donbor bad ki kam pyntriem jong ki BSF katkum ka “Commissions of Inquiry Central Act”.
Ka KHNAM ka la dawa ruh ban weng ïa ki shipai BSF na ki jaka paidbah bad ban pyntikna ba kin don tang ha u ‘Zero Line’ jong ka jaka khappud bad ka Bangladesh (international border).
Ha u kyrwoh ba la pyllait lyngba u Bah Thomas Passah, uba dei u Working President ka KHNAM, ka la ong ba ka jingjia ha Lad Umsyiem ha kaba ki BSF ki la bom lathi bad pynsaw ïa ki paidbah wat haduh ban siat sha suiñ ha ka miet 25 tarik kam dei shuh ka sien kaba nyngkong ha kaba la sakhi ïa ka jingleh donbor jong ki BSF.
“Dang ha ki khyndiat sngi la don u ’riew paidbah ba la shah siat ïap ha ki BSF. Lada ka Sorkar Jylla kan dang ïai leh jem halor ka jingleh donbor ki BSF, kin dang don ki ban dang duh ei ïa la ka jingim. Ka dei ka kamram jong ka Sorkar Jylla ban peit ïa ka shongsuk shongsaiñ ha ka jylla bad ki BSF kim lah ban tam ïa u pud lane ban knieh ïa ka iktiar ka Sorkar Jylla. Kane ka jingleh jong ki BSF ka pynpaw ïa ka jingbymkheiñ snep jong ki ïa ki bor District bad ïa ka Sorkar Jylla bad ka long kaba beaiñ,” la ong u Bah Thomas Passah.
U la ong ba ka Sorkar Jylla ka dei ban ujor da ka FIR pyrshah ïa ki BSF katkum ki kyndon (sections) 147, 148, 323, 353, 427 jong ka Indian Penal Code (IPC).
Haba dawa na ka Sorkar Jylla ban thaw da ka Inquiry Commission halor baroh ki jingleh donbor bad ki kam pyntriem jong ki BSF, u Bah Thomas Passah u la pynkynmaw ïa kawei ka jingjia ha ka 10 tarik Naitung, 1987 ha kaba ka Sorkar Jylla ka la thung da ka Inquiry Commission halor ka jingpynkulmar jingbom lathi bad jingsiat pathar ki BSF ha Baghmara.
“Lada ka don ka jingthombor da ki BSF ha ki thaiñ Khasi ruh, ka Sorkar ka dei ban shim ïa kijuh ki sienjam ym ban leh shiliang,” la pynpaw u Bah Thomas Passah.
