Nongstoiñ, Jylliew 26:
Ha ka sngi Nyngkong jong ka taïew, ka Myntri ka tnat ka Koit ka Khiah ka Jylla ka Kong Ampareen Lyngdoh ka la hiar da lade ban jurip ïa ki jaka sumar ha Nongstoiñ kaba long ka nongbah jong ka West Khasi Hills District.
Ka Kong Ampareen ka la sdang ïa ka jingleit jurip ïa ki jaka sumar naduh dang step da kaba leit sha MCH Hospital, Civil Hospital bad ka TB Hospital jong katei ka district. .
Ïa ka Kong Ampareen ha katei ka sngi la synran lang da u MLA ka Nongstoiñ u Bah Gabriel Wahlang, u Myntri ka tnat ïalehkai ka sorkar Jylla u Bah Shakliar Warjir, u MLA ka Mawshynrut u Bah Methodius Dkhar, u MLA ka Rambrai u RG Momin, u Deputy Commissioner ka West Khasi Hills u Bah Garod LSN Dykes, ki ophisar na ka tnat ka koit ka khiah bad kiwei kiwei.
Hadien ka jingleit jurip, na ka liang ka Kong Ampareen ka la ïoh ruh ban shong jingïalang bad ki kynhun seng na West Khasi Hills kum ka Hynñiewtrep Youth Council, Ri Khasi Sepngi Federation bad ka HNYM.
Nalor ka jingïalang bad ki kynhun seng, ka Myntri ka la ïoh ruh ban pynlong ïa ka jingïalang bad ki nongtrei ka tnat ka koit ka khiah ka WKH ban ïathir ïatai halor kiba bun ki bynta jong ki jingdonkam ha liang ka koit ka khia ha kane ka district ïa kaba la pynlong ha kamra jingïalang ka shlem treikam u DC Nongstoiñ.
Haba kren sha ki lad pathai khubor, ka Kong Ampareen ka la pynpaw da kaba ong, “Nga la wan, nga la ïohsngew bad la ïohi bad kin sa pynkhreh ïa ka kaiphod bapher bapher ki jong ki, ki MLA baroh la bthah ba kin leit sha ki konstitwensi ban peit kaei kaba donkam ban leh, yn nym lah ban leh lut. Hynrei lada ngi lah ban leh san na ka shiphew ka la long ka jingbit jingbiang ïa ki nongshong shnong namar ngi wan ban jurip na ka bynta ki nongshong shnong ym na ka bynta jong ngi.”
Ka la ong ruh ba kum ka Myntri ka tnat ka koit ka khiah ka donkam ban leit sha man la ki district bad lada lah donkam ban leit sha man la ki block bad kane ka dei ka sien kaba nyngkong ban ïakynduh ïa ki MLA jong ka West Khasi Hills, u DC, ki nongtrei na ka tnat ka koit ka khiah bad baroh la khot lang bad la ïoh ban ïathir ïa kiba bun ki mat kiba donkam ban khmih.
Ka la pynpaw ruh ba ha ka jingïakynduh la pynsngew ïa kiba bun ki jingeh shaphang ka bording, ka um, ka jingduna ki nongtrei bad kiwei kiwei. Kum kane ka jingïakynduh lang ka long kaba donkam bad u DC u la shimkhia lem ïa kita ki jingud jingnam. Nangne shakhmat dang don san snem duna khyndiat ban pyndep la kumno kumno lada lah ban leh shiphew tylli kiei kiei kiba bha na ka bynta ban pynkhlaiñ ïa ka koit ka khiah ha ki jaka nongkyndong tharai kane ka sorkar kan lah ban leh shibun ki kam na ka bynta ki nongshong shnong.
Shuh shuh ka la ong ruh ba u DC u la don lang ha ka jingïalang bad u DC u la ong ba un sa peit bniah ïa kiei kiei bad un sa phah ïa ka kaiphod khnang ba yn lah ban pynbeit ban ai ïa ki jingdonkam sha ki paidbah.
