Nongstoiñ, Jylliew 26:
Ka Myntri ka tnat ka Koit ka Khiah ka Jylla, Kong Ampareen Lyngdoh, ka la ong ba hap ban pynkynriah noh ïa ki tiar na MCH Hospital Nongstoiñ namar naduh lai saw snem la thied ïa ki tiar bad tieng ïoh ki tiar ki sniew noh bad la ïa rai ba rah shuwa sha Mawkyrwat.
Ïa kane na ka liang ka Kong Ampareen ka la kren ha ka jingïakynduh bad ki lad pathai khubor ha ka sngi Nyngkong ka taïew hadien ka jingleit jurip ïa ki jaka sumar ha WKH kynthup ïa ka MCH Hospital, Civil Hospital Nongstoiñ bad ka TB Hospital.
Shuh shuh ka la pynpaw ruh ba na ka bynta ka MCH Hospital Nongstoiñ la mang thymmai da kiwei pat ki tiar bad kyrmen hapoh lai bnai yn lah ban pynpoi pat.
Haba jubab pat lano yn plie ïa kane ka MCH Hospital Nongstoiñ, na ka liang ka Myntri ka la ong ba kane ka dang don hapdeng ka jingpynkhreh na ka bynta ban mang ïa ki kam. Nangne kan don ruh ka jingïakren hapdeng ki MLA, u DC ka District bad ki nongshong shnong ban ïa pyrkhat kumno ban leh namar ka MCH ka dei ba 50 jingthiah, ka Civil Hospital Nongstoiñ ka dei ba 100 jingthiah bad 80 shah ka Civil Hospital Nongstoiñ la shong da ki MCH bad ym lah ban shu ai rai mynta halor kata.
