Shillong, Jylliew 26:
U Chief Executive Member (CEM) ka KHADC, u Bah Pynïaid Sing Syiem u la kular ban thaw ki lad ki lynti lyngba ka Executive Committee ban pynneh pynsah bad pynbha shuh shuh ïa ki riti dustur jong ka jaitbynriew ha kaba ki MDC ki ïeng skhem ba ka jingshim jait ka dei beit na ka kmie namar ka jingshim jait na u kpa ka pynkulmar bad ïalam sha ka shong sang hadien habud ha ka shongkha shongman.
U CEM u la pynpaw ïa kane haba ai jubab halor ka jingïatai kaba la wanrah da u MDC ka Shella, u Bah Teiñwell Dkhar ha Ïingdorbar ha ka Lah Sngi U Blei halor ka jingdonkam ban pynneh ïa ka jinglong kyrpang ki riti dustur ka jaitbynriew Khasi da kaba kren kyrpang ruh shaphang ka jingïoh pateng bad kyntiew ïa ka lariti lyngba ki tamasa bad kiwei kiwei ki rynsan.
U Bah Teiñwell u la banjur ban pynskhem ïa ki riti dustur jong ka jaitbynriew ha ki jingthoh khlem da kheiñ niam bad donkam ban pynneh pynsah ïa kiba bun ki riti dustur bad ki lariti.
Une u MDC na Shella u la khot la wer ban pynneh ïa ka jait kmie bad ban nym shah ban shim jait kpa namarba ka jaitbynriew Khasi ka dei kaba kyrpang ba ka shim jait na ka kmie
Kiwei ki MDC ruh ki la ïashimbynta naduh u CEM barim, u Bah Titosstarwell Chyne, Bindo M Lanong, Balajied Rani, Ronnie V Lyngdoh kiba la kren bun kiei kiei halor ka jaitbynriew bad ka jingshim ïa ki sienjam da ka Executive Committee ban pynneh bad nang kyntiew ïa ka jingriewspah ha ka liang ka lariti la ka dei ka shad ka rwai bad ka put ka tem tynrai.
Ki MDC ki la kren shaphang ka jingkhanglad ïa ki bym dei Khasi ban pynkylla sha ka jait Khasi lyngba ka affidavit bad pynneh ïa ka jait kmie, ka jingpyni sha ka pyrthei ïa ka lariti babun naduh ka jingpynlong ïa ka monolith festival ka ban kyntiew ruh ïa ka kam jngohkai.
Kiwei pat ki mat kiba la ïakren ki long ban kyrshan ïa ka jingpynlong ïa ka Shad Suk Mynsiem, ban pynsted ïa ka Clan Administration Bill, ka jingithuh ïa ka Shaw Bhoi lane Ringbia nalor ka jingshim jingkitkhlieh ban pynbha ïa ka ïing ka sem
U CEM u la ong ba ka EC kam thaw lad kumno ban ïoh pisa ban ban pynlong ïa ka Monolith Festival lyngba ka jingkyrshan ka Sorkar Jylla bad kiwei ki tnt kum ka Ministry of Tribal Affairs
U CEM u la ong ba ka Council kan nym ailad ban shim jait na u kpa hynrei dei ban shim na ka kmie namar ka jingshim jait kpa kan ïalam sha ka shong sang hapdeng kiba dei shi bahaïig bahasem.
U la kular ruh ban buddien ïa ka EC kaba rim kaba la mana ban pynkylla ïa ka jait Khasi lyngba ka affidavit nalor ka jingshimkhia ïa ka Clan Administration Bill khnang ba kiba bun ki riti dustur kin rung ha kane ka Bill kum ka Shaw Bhoi ne Ringbia.
U la ong ruh ba ka EC kan shimkhia ban ïoh sdang ïa ka jingai jinghikai halor ka tiar tem tiar put tynrai.
