Shillong, Jylliew 26:
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba ka jingjia kaba la jia ha ka miet Sngi U Blei ha Lad Umsyiem ka don jingïadei bad ki kam khaïi be-aiñ.
Ka jingjia kaba wanrah jingsyier biang ïa ki paidbah ka thaiñ khappud bad ka Bangladesh ha thaiñ Dawki ka la jia ha ka miet Sngi U Blei ha kaba ki shipai BSF ki la siat kuli sha suiñ hadien ba ki paidbah ki la wan ïalum hajan ka ktem jong ki kaba don ha Lad Umsyiem hadien ba 4 ngut ki shipai BSF kiba la buaid kyiad ki la khie waleng bad shoh pynmynsaw ïa ki ’riew paidbah.
Katei ka la jia ha ka por kumba 9.30 mynmiet ha Lad Umsyiem kaba hap ha Pynursla Civil Sub-Division, East Khasi Hills District.
“Kane ka la jia hynnin ka miet, ka la don ka jingjia ha kaba katto-katne ngut ki ’riew paidbah kiba ïadon bynta ha ka ban khaïi be-aiñ ïa katto-katne ki mar…ki la shah kem bad kumta la kurup noh ïa ka mar jong ki,” la ong u Sangma haba kren sha ki lad pathai khubor.
U la ïathuh ruh ba katkum ki kaiphod ba la ïoh lum, ka la don ka jingïalum paidbah bad hadien kane, la sdang ka jingïakawang maw.
“Haba ïadei bad kane, la siat 4 sien sha suiñ bad ym sha ki briew. Ha katei ka jingïakawang maw, ki la don katto-katne ngut kiba la mynsaw hynrei ym namar u kuli,” la ong u Myntri Rangbah.
Haba kdew ba ka Sorkar ka dang tohkit halor kane ka bynta, u la ban biang ba ki 4 kuli kiba la siat ki dei kiba la siat sha suiñ ban pynpra ïa u paidbah.
“Kumba nga ong, kane ka don jingïadei bad ki kam khaïi tuh…la kurup ïa ki mar bad ka la don ka jingïakawang maw na ka liang ki paidbah bad ban tehlakam, la leh ïa kane,” u la ong.
U Sangma u la ong ruh ba kumba ka long mynta, la lah ban tehlakam ïa ka jinglong-jingman hynrei ka Sorkar ka long kaba peitngor haba ïadei bad kane ka liang.
Shuh shuh haba kylli halor ka jingpynsngew na ki nongshong shnong ba balei ki shipai BSF ki rung sha ki shnong ki thaw wat la ka kamram jong ki ka long ha ki jaka khappud, u Myntri Rangbah u la ong, “Lada don kiba kum kine, ngin sa shimkhia.”
Nalor kane, u la bynrap ba ka Sorkar ka dang ap shuh ïa ki jingtip ba bniah halor katei ka jingjia.
