Shillong, Jylliew 26:
Ki shipai Border Security Force (BSF) jong ka Meghalaya Frontier, ha ka Lah Sngi U Blei ki la kynnoh ba ka jingjia ha Lad Umsyiem ha ka miet Sngi U Blei ka dei kaba la sdang shwa da ki nongkhaïi mar be-aiñ sha Bangladesh ha kaba ki la kawang maw ïa kine ki shipai pahara khappud.
Ha u kyrwoh khubor, u Public Relations Officer (PRO) ki shipai BSF Meghalaya Frontier u la ong ba ha ka miet jong ka 25 tarik Jylliew, ki shipai BSF na ka 4th Battalion kiba don ha Lad Umsyiem, ki la ïohi ïa ka jingïaid ki runar ha ka surok Dawki-Pynursla hajan khappud.
Hadien kata, kita ki shipai BSF ki la leit sha ka jaka ba don kita ki runar bad hadien ba ki runar ki la ïohi ïa ki BSF, ki la bret noh ïa ki mar kiba ki la kit bad ki la phet krad. Ha ka jingwad, ki BSF ki la shem ïa ki jaiñ Saree kiba shongdor T. 50,000.
Nalorkata, u PRO u la ong ba hynnin ka sngi ha katei kajuh ka thaiñ, ki BSF ki la ïoh kurup ïa ki jaiñ ki nep ba shongdor T. 2.21 lak bad kine ki dei ki mar ba la thmu ban shalan tuh sha Bangladesh.
U la ïathuh ruh ba katto katne por hadien ba la ïoh kurup ïa kitei ki mar, ki la don ki runar kiba la wan ïeng hajan ka ktem ki BSF bad ki la rung shapoh bad ki la kawang da ki maw bad ki bilor ïa ki shipai BSF.
U PRO u la ïathuh ba ha kane ka jingshah kawang maw bad bilor, arngut ki shipai BSF ki la mynsaw. Ha kajuh ka por u la ong ba namar ki sheptieng ïoh mih ka jingkulmar ba kham jur, ki shipai BSF ki la siat saw kuli sha suiñ ban pynpra ïa kita ki runar.
Na ka liang ki BSF ki la pyntip halor katei ka jingjia sha ki pulit ka thanat Pynursla kiba la wan bad hadien katto katne, ka jingjai-jai ka la wanphai.
U PRO u la pynkynmaw ba ha ka 5 tarik Jylliew, ka la don kaba kum katei ka jingjia ha kaba ki BSF ki la kurup ïa ki jaiñ ki nep ba shongdor palat T. 1 lak bad ha kata ka por, ki runar ki la kawang maw ïa ki BSF bad uwei na ki shipai BSF u la mynsaw na khlieh.
Nalorkata, u PRO u la ong ba ka Umsyiem ka dei ka jaka kaba la ju pyndonkam bha da ki nongkhaïi be-aiñ ban shalan tuh ïa ki masi, jaiñ, jingtah khmat bad kiwei sha Bangladesh bad ki don bun bah ki kynhun shalan be-aiñ kiba treikam ha kane ka thaiñ kiba pyrshang ban pynthut ïa ka ka shongsuk shongsaiñ tang ban myntoi shimet.
