Shillong, Jylliew 26:
U nongmudui ïa kawei ka mukotduma ha Meghalaya High Court ha kaba ïadei bad ki kam tih dewïong be-aiñ, ha ka Lah Sngi U Blei u la pyntip sha ka ïingbishar ba arngut ki nongtih dewïong kiba dei na Assam ki la khlad ha South Garo Hills.
U Champer M. Sangma, lyngba u muktiar jong u, u Sujeet Dey, u la ong ba ka jingtih bad jingkit dewïong ha kane ka jylla ka ïaid sahuh beit watla ka jingkhlad jong ki arngut ki nongtih dewïong kiba na Assam ha South Garo Hills ka khlem paw satia ha kino-kino ki lad pathai khubor ka jylla.
Hynrei utei u muktiar u la pyntip sha ka ïingbishar ba u la ïoh ïa ka khubor kaba tikna ha kaba ïadei bad ka jingkhlad jong kitei arngut ki nongtih dewïong bad ïa kata ka khubor u la ïoh na uwei na ki Superintendent of Police (SP) jong kawei na ki distrik ha Assam. Ha kajuh ka por, u Dey u la pyntip sha ka High Court ba uta u heh pulit um shym la kren eiei shuh namar u la kyntait ban jubab ynda u la ‘phone’ biang ïa u.
Shuh shuh na ka liang u Champer u la kam ba u don da ki dur-khih (Video) ba u la ring ban pyni ïa ka jingïaid jong ka jingtih bad jingkit dewïong be-aiñ.
Kumta ka High Court ka la bthah ïa u Champer ba ïa ki dur-khih lah ban pyni hapoh ka ïingbishar ynda la long biang ka jingbishar ha ka 4 tarik Naitung, 2023. La bthah ruh ba uwei na ki heh sorkar u dei ban don lang ha katei ka sngi khnang ba un lah ban ai jubab halor kata ka dur khih ba la ring bad ba yn sa pyni.
