Shillong, Jylliew 26:
U MDC ka Liang Pyrshah ha ïingdorbar Khasi Hills Autonomous District Council (KHADC) u Bah Jambor War u la ong ba ki paidbah mynta ki kwah ban tip ïa ka nongrim jong ka Executive Committee (EC) bathymmai ba la lamkhmat da ka NPP ha KHADC ha kaba ïadei bad ka jingpynbeit pud ha ka wat ba-ar hapdeng ka Meghalaya bad Assam.
U Bah Jambor haba kren halor ka ‘motion’ kaba u la wanrah hapoh ka dorbar lyiur ha ka sngi Nyngkong ha kaba ïadei bad ka kam ne ka nongrim jong ka EC ba mynta halor ka jingpynbeit pud beit sam, u la ong, ki paidbah ki kwah ban tip ba kaei ka nongrim jong kane ka EC ba mynta, namar wat la na ka liang ka EC barim ka la pynbiang lut ïa ki kot ki sla, sngewsih ba ka Sorkar kam shym la ïaid katkum ki kot ba la ai hynrei ba ka jingpynbeit pud ka la long beit da kaba pynshong nongrim ïa ka kaiphod jong u snem 2011, ka kaiphod kaba ka Sorkar Meghalaya ka la aiti sha ka Sorkar Assam.
U la ong ba lada na ka liang jong kane ka EC kam shym ïeng ha ka nongrim ha kane ka jingïakren pynbeit pud ha ka kylla ba ar, ïohi ba don ka jingma ban nang duh shuh shuh ki jaka puta.
Une u MDC ka UDP na Mawthadraishan haba wanrah ïa ka ‘motion’ u la ong ba ka mat khappud ka dei ka mat ba hap ban ïakren biang namar ha kine ki 4 snem la jan man ka jingshong dorbar la ïakren ïa kane ka mat.
“Ngi sngew ba ka dei ka mat, kaba dei por ban ïakren namar ba ïohi ba na ka liang jong ka sorkar, ka la pynkhreh shaid shaid na ka bynta ban sdang biang ïa ka jingïakren ban pynbeit pud pynbeit sam hapdeng ka Meghalaya bad Assam,” la ong u Bah Jambor.
U la pynkynmaw ba na ka liang jong ka EC barim hapoh ka jingïalam u Bah Titosstarwell Chyne, ka la shimkhia halor kane ka kam, namar ba ka ïatyngkhuh u pud u sam ka council, ki hima, raid bad elaka, bad ban ong ba ha kine ki 4 snem ka EC ka khlem shimkhia, kata ka jingkren dei kaba bakla haduh katta katta.
“Nga pynkynmaw ba shwa ba ka sorkar kan sdang ban ïakren pynbeit pud, ka council lyngba ka EC ka la dep ban sdang ïa ka kam da kaba thaw ïa ka Boundary Committee ha u snem 2020. Ngi la trei shitom bad la lum la lang ïa ki kot ki sla, ki dulir ban pynshisha,” u la ong.
U Bah Jambor u la ong, ka nongrim ka EC ba la dep ka long ba u pud u sam jong ki hima, elaka, raid bad dorbar shnong ki dei u pud u sam ka council bad ba dei ban long ruh u pud u sam ka jylla Meghalaya.
“Ngi la lah ban lum ïa ki kot ki sla jong ki 10 tylli ki jaka ba hap ha council, ngi la lah ban pynbiang ïa ka kaiphod kaba pura, kaba mynta ka don ha ophis council, bad ïa kane kajuh ka kaiphod ba la pynbit pynbiang, ngi la ïoh ruh ban phah sha ka Sorkar Jylla ha ka 15 tarik Nohprah, 2021,” la ong u Bah Jambor.
“Ha ka jingpynbeit pud ha ka wat ba nyngkong, baroh ngi la ïadon lang ha ki regional committee, ha ki jingleit jurip bad ha ki jingïakren kumno ban ïa pynbeit u pud u sam, hynrei sngewsih ba ha ka bynta ba khatduh ban pynkut noh ïa ka jingpynbeit pud ha ka kylla kaba nyngkong bad ban ïasoi ïa ka MOU, ha ka 29 tarik Lber, 2022, sngewsih ka long ba ïa ka district council la leh klet, ïa ki hima la leh klet, ïa ki raid, ki dorbar shnong kiba dei hok ki trai khyndew trai jaka la klet noh,” la ong shuh u Bah Jambor.
“Kumta nalor ba ngi la dep ban duh lypa ki jaka ha ka wat kaba nyngkong, lada kum kane ka lynti ka dang bteng, ngin sa nangduh shuh shuh ha ka wat kaba ar,” ong u Bah Jambor.
Katba na ka liang u Nongïalam ka Liang Pyrshah ha KHADC u Bah Titosstarwell Chyne haba shim bynta lang u la ong, “Ngi la khmih lynti ba ka sorkar kan mynjur bad syllok lang kaei ban rai shwa ban soi ïa ka MOU. Hynrei sngewsih ka long ba ïa kaei ka kaiphod ba la ai, la buh sharud. Kaei ka kaiphod jong ka Regional Committee la buh sharud, bad ka Sorkar ka la pynkheiñ ïa ka para 20 jong ka Sixth Schedule, namar ba ha ka Sixth Schedule, katkum ka Assam Reorganisation Act 1969 bad ka North East Reorganisation Act 1971, ïa u pud u sam jong ki distirct council la shim katkum ka para 20, ka nongrim jong ngi, u pud u sam dei ban long kum u pud u sam ki hima.”
