Shillong, Jylliew 26:
Ka Commissioner of Food Safety, ka Kong R.M. Kurbah, ha ka Lah Sngi U Blei ka la pynmih ïa ka byrta ha kaba ka la pyntip ba ka la weng noh ïa ka hukum ban buh, sam bad die ïa ki dohkha ba wanrah nabar jylla ïa kaba la pynmih ha ka 8 tarik Jylliew, 2023.
Lah ban kdew ba ka Kong Kurbah ka la khang 15 sngi ïa ka jingdie ïa ki dohkha ba wanrah nabar jylla hadien ba la lap ba 30 na ki 40 tylli ki dohkha ba la lum na kylleng ka jylla ki dei kiba la khleh da ka dawai ‘Formalin’ (Formaldehyde) kaba buh jingma ïa ka koit ka khiah jong ki nongbam dohkha.
Hynrei, mynta ka sngi pat, ka Kong Kurbah ka la pyntip ba la weng noh ïa katei ka hukum naduh ka 24 tarik Jylliew, 2023, bad namarkata, la lah ban buh, sam bad die biang ïa ki dohkha kiba thied na shabar jong ka jylla.
