Shillong, Jylliew 26:
Ka tnad pulit ka Jylla ha ryngkat ka jingïasnoh kti lang bad ka tnad Social Welfare ha ka Lah Sngi U Blei ka la rakhe ïa ka ‘International Day Against Drug Abuse and Illicit Trafficking’ ha U Soso Tham Auditorium.
Haba ai jingkren kum u kongsan, u Myntri Rangbah ka Jylla, u Conrad K. Sangma u la ong ba ka Sorkar ka la shim ïa ki sienjam kiba la ïa mynjur lang ban pyntikna ba ka Meghalaya kan long ka Jylla kaba lait na u drok.
“Ïa ki mat treikam bad ki prokram jong ngi la pynwandur ha kata ka rukom ba ngi buh hakhmat eh ïa ki paidbah kiba kongsan bad kumta kane ka sienjam ban don ïa ka kynhun ba kyrpang ban tehlakam ïa ka jingkynrei bad jingkhaïi be-aiñ ïa u drok ka long shi bynta jong ka bynta kaba heh jong ka jingïakhun ym tang ïa u drok hynrei na bynta ka bha ka miat jong ki samla,” u la ong.
U Sangma u la kdew ba ka jingrakhe ïa kane ka long ruh kum shi bynta jong ka jingpyrkhat kaba kham heh khnang ban pyntikna ha ka ban pynmih ïa ki samla kiba seisoh, kiba kitkhlieh bad kiba koit ba khiah na bynta ka lawei jong ka Jylla.
“Baroh ki prokram halor ka bha ka miat bad ka roi ka par kumjuh ki mat treikam jong ka Sorkar kin long leh noh ei lada ki samla ki ngop noh ha u drok. U drok u pynjot ym tang ïa u nongpyndonkam hynrei ki longïing, ka imlang-sahlang bad ka lawei,” u la bynrap.
Haba ai jingïaroh ïa ka tnad pulit halor ka jingkem ïa ki nongkhaïi drok kumjuh ban kurup ïa u drok ba shong dor da ki klur tyngka ha kine ki khyndiat bnai ba la dep, u Myntri Rangbah u la kyntu ïa ka tnad ban bteng ïa ka jingshakri ha ka ban tehlakam bad rat dyngkhong shi syndon ïa u drok napoh ka Jylla.
“Katba ka tnad treikam ka pyndep la ka jong ka kamram, ngi donkam ban pyntikna ba ki 40,500 tam ngut ki samla kiba shaniah tylli tyllan ha u drok ki ïoh ïa ka jingsumar da kaba sngewthuh ïa ki jingsngew jong ki, ha kajuh ka por ban kitkhia ïa ki khnang ba ki lah ban pynïasoh biang sha ka imlang-sahlang kum ki nongshong kiba don ka jingktikhlieh,” u la ong.
Haba kren shaphang ka DREAM – Drug Reduction, Elimination and Action Mission, kaba u la plie kham ha shuwa, u la ong ba ka jingpynlut na bynta ka jingpyntreikam ïa ka DREAM ka long T.10 klur shi snem, kaba long T.50 klur ha ki 5 snem ban wan.
“Ngin sa pynïeng ïa ki ‘Rehabilitation’ bad ‘Detoxification Center’ bapher-bapher bad ngin ai jingkyrshan ïa ki NGO ha ka liang ka pisa na bynta ka jingsumar, nalor kiwei-kiwei ki prokram,” u la ong.
U la kyrpad ruh ïa ki NGO, ki nongïalam niam, ki jaka pule bad nongïalam ha ka imlang-sahlang bad ki kynhun seng bapher-bapher ban pynlong ïa ka jingïakhun pyrshah ïa u drok kum ka mat kaba hakhmat eh jong ki.
Ka Drug Reduction, Elimination and Action Mission (DREAM) kan dei shi bynta jong ka Meghalaya Drug Abuse Prevention Policy, 2020 ban kynjoh ïa ka thong; kata ban rat dyngkhong ïa ka jingpyndonkam drok hapoh ka Jylla.
Na ka liang u DGP ka Jylla, Dr. L.R. Bishnoi ha ka jingbatai jong u, u la kdew ba ki don 3,01,500 ngut ki briew kiba pyndonkam drok hapoh ka Jylla. Na kine, 40,800 ngut ki dei kiba shaniah tylli-tyllan ha u drok.
U la ïathuh ruh ba mynta u snem, ki don 225 ngut ki briew kiba la shah kem halor ka jingdonkti bad ki kam khaïi drok ba kynthup ïa 199 ngut ki shynrang bad 26 ngut ki kynthei.
Ha kane ka sngi, u Myntri Rangbah u la pyllait ruh ïa ka ‘Drug Free Meghalaya App’, bad aiti ruh ïa ka ‘Drug Detection Kit’ sha ka tnad Anti-Narcotics Task Force nalor ka jingpynkup burom ïa ki NGO, ’riew shimet bad ANTF halor ka jingminot jong ki ban ïakhun pyrshah ïa utei u jingdih pynbuaid bad ka jingpyllait ïa ka jingrwai “Turn the Tide” da ka Khaki Vibes.
Ha kane ka sngi la ïadonlang ruh u Symbud Myntri Rangbah ka Jylla, Bah Prestone Tynsong, Additional Chief Secretary (Home), Dr. Shakeel P. Ahammad, nalor kiwei-kiwei.
