Khliehriat, Jylliew 26:
Ki pulit jong ka East Jaiñtia Hills District ki la ïoh kurup ïa u kynja ba khia palat 100 kilo bad kem ïa arngut ki briew kiba donkti ha kane ka kam.
Kat kum ka khubor na u Superintendent of Police ka East Jaiñtia Hills District u Jagpal Singh Dhanoa, IPS, u la ong ha ka 25 tarik Jylliew ha ka por kumba 11.00 baje mynstep ki la ïoh jingtip ba arngut ki briew kiba kynthup ïa u Mintu Debnath bad Mithan Debnath kin mih na Silchar ban kiew sha Lumshnong da ka kali Hyundai Santro kaba don ïa u Registration No. AS-11-C-5741 bad kit ïa ki mar beaiñ.
Kumta ka kynhun pulit ANTF bad ki pulit jong ka thanat Lumshnong mar-mar ki la pynap shrip ïa ki ha Lumshnong bad ha ka por kumba 12:30 mynsngi ki la pynsangeh ïa katei ka kali bad la bat ïa ka.
Ha ka jingkhynra la lap ïa utei u kynja ba la tyrsad ha ki bynta bapher bapher ka kali ba la song ha ki 55 tylli ki jingsong. Haba la peit bniah la pyntikna ba u dei u kynja uba khia 100 kilo.
Kine ar ngut kiba la shah kem ki long u Mithan Debnath 34 snem na Naraura (Bishalgard) District-Sepahijala, Tripura bad u Mintu Debnath 35 snem na Jangalia, Bishalgarh, Tripura.
Haba ïadei bad kane ka jingjia la pynrung kyrteng ïa ka case ha thanat Lumshnong katkum ka case No. 34(6)2023 u/s 20(b)(i) (C)/29 NDPS Act bad ka jingtohkit ka la ïaid shakhmat.
