Shillong, Jylliew 26:
Ki MDC ka Khasi Hills Autonomous District Council (KHADC) ha ka sngi Nyngkong ki la pynpaw ïa ka jingsngewkhia halor ka jingwan phetwir jong ki briew na Manipur sha Shillong hadien ba mih ka jingkynad bad jingumsnam ha katei ka nongbah.
Haba wanrah ïa ka ‘motion’ ban ïakren halor ka jinglong jingman ka shongsuk shongsaiñ hapoh ka Khasi Hills district, kumjuh ruh ka jingmih ka jingïasngew pher jaidbynriew ha ka jylla ba marjan na ka jingdon ïa ka khappud ba laitlan, u MDC shu sieh ha KHADC u Bah Bindo Mathew Lanong u la ong ba kiba bun ki dong ha nongbah Shillong ki mad ïa ka jingeh namar ka jingwan phetwir jong ki briew na Manipur.
“Nga la dap da ka jingkmen ban ïohi ba ka Executive Committee (EC) barim ka la shimkhia halor kane ka jingeh da kaba lum jingïalang bad ki Rangbah Shnong na ki dong bapher bapher hapoh ka nongbah Shillong,” la ong u Bah Bindo.
Kat kum ka jingpynpaw ka jong u, kiba bun napdeng ki briew kiba la wan phet na Manipur ki la kam ba kin sah shipor bad ki bahaïing hasem ki jong ki. U la ong ba kum kane ka la paw ruh ha ka thaiñ Madanrting.
“Ki ’riewlum na Manipur ki la wan phetwir ym tang sha ki bynta bapher bapher ka thaiñ shatei lam-mihngi, hynrei ki la phetwir ruh sha ki jaka ba kham jngai ki ri mihngi kum sha Thailand bad Burma. Namarkata, ka council ka donkam ban bthah peitngor ïa ki dong bapher bapher halor kane ka jinglong jingman,” la ong u Bah Bindo.
Shuh shuh une u MDC ba la rangbah ka KHADC u kyntu ba kane ka EC bathymmai ka dei ban ai jingbthah sha ki dong bad ki shnong bapher bapher ba kin pyntikna ba kine ki briew ba la wan phetwir na Manipur kin leit phai biang sha la ki shnong ynda ka jingsuk ka la wan phai biang.
Haba pynpaw ïa kajuh ka jingsngewkhia, u Nongïalam ka Liang Pyrshah u Bah Titosstarwell Chyne u la ong ba kiba bun na ki Rangbah Shnong ki la dep ban pynmih ki jingbthah kiba shai ba ki trai ïing kim dei ban ai wai ïa ka ïing jong ki sha ki briew ba nabar.
Katkum ka jingpynpaw ka jong u, kane ka jingbthah na ka liang jong ki Rangbah Shnong ka la wan hadien ba ka council ka la dep ban lum jingïalang dang shen ban ïakren ïathir halor ka jingwan phetwir ki briew na Manipur.
“Hynrei la pyntip sha nga ba kiba bun ki Rangbah Shnong ki la shah byrngem na ka bynta ka jingpynmih kum kine ki jingbthah. Kiba bun ki la buh jingkylli ïa ki ba hapoh ki kyndon jong kane ka aiñ la khang ïa ki ban ai wai ïa ka jaka jong ki sha ki briew ba nabar,” la ong u Bah Titos.
U la ong ruh ba ki la ïoh pdiang ka kaiphod ba ki briew kiba wan phetwir na Manipur, mynta ki la pyrshang ban thied jaka ha shnong Maikhuli bad kiwei ki shnong khappud.
U Bah Titos u la kyrpad ïa ka Executive Committee ba thymmai ba kan shimkhia halor kane ka kam.
Ha kawei pat ka liang, u la kyntu ruh ïa ka Sorkar Jylla ba kan buh ïa ki ktem sah shipor na ka bynta ki briew kiba wan phetwir na Manipur.
“Ka Sorkar Jylla ka dei ban don ka jingkheiñ ba katno ngut ki la wan phetwir sha Meghalaya bad haduh katno ngut na ki, kiba la leit phai hadien ynda wan phai ka jingsuk,” u la ong.
U MDC shimet na Nongthymmai, u Bah Latiplang Kharkongor u la ong ba u la ïoh pdiang bun ki ‘telephone’ na kiba bun ki Dorbar Shnong, kiba la pyntip ba ki la ïoh jingtip bad lap ïa ki briew kiba wan phetwir na Manipur.
U la ong ba kine ki dorbar shnong ki la leit ruh sha ki pulit, hynrei la pynpaw ba ka long kaba eh ban leh ïa kaba donkam namar kam shym la don satia kano kano ka jingbthah na ka Sorkar Jylla.
“Ngi donkam ban shim kyrpang ïa kane ka kam naba kiba bun ki kali na Manipur ki la wan rung shapoh ka jylla, khamtam ha Madariting. Ym don uwei ruh ban buddien ïa ka leit ka wan jong kine ki briew. La pyntip sha nga ba wat ka khyrdop talasi ruh kam shym la treikam bha satia,” la ong u Bah Latiplang.
Haba kyrpad ïa ka Executive Committee ba thymmai ban shimkhia halor kane ka kam, u la buh jingkylli ba um shym la ïohi satia ïa kano kano ka lad ka lynti ban shim na ka liang jong ka sorkar.
Haba jubab halor kane, u Deputy CEM Bah Pynshngain N Syiem u la ong ba ka EC kaba thymmai kan shim lut ki lad ki lynti ban bthah ïa ki dong bad ki shnong bapher bapher ba kin long kiba peitngor halor kane ka jingeh jong ka jingwan phetwir ki briew na Manipur.
Kat kum ka jingpynpaw ka jong u, ki Syiem, ki Lyngdoh bad Wahadadar bapher bapher ki dei ban pyntikna ba kin bud ryntih bad ki jingbthah jong ka council ban peit ba lada don ki briew na Manipur kiba rung sha ki dong ne ki shnong kiba hap hapoh u pud u sam jong ki.
