Shillong, Jylliew 26:
U Myntri Khynnah ka Sorkar Pdeng ba dei khmih ïa ki tnat Electronics & Information Technology bad Skill Development & Entrepreneurship, u Rajeev Chandrasekhar, un wan sha kane ka jylla na ka bynta ar sngi bad kane kan sdang naduh ka Sngi Ba-Ar.
Ha kine ki ar sngi, u Chandrasekhar un ïakynduh ïa ki nongtrei bad nongkyrshan ka BJP, ki nongïalam jong ki kynhun bapher bapher, ki nongtrei kam lajong bad un ïakren bad ki halor kita ki jingjop jong ka sorkar ba la ïalam da u Narendra Modi ha kine ki khyndai snem.
Lashai ka sngi, u Myntri un don jingïalang bad ki nongkitkam ka seng BJP bad hadien kata, un sa leit jngoh ïa ka Ïingmane Bah (Cathedral) ha Laitumkhrah bad hangne, un ïakynduh bad ki nongïalam jong ki kynhun bapher-bapher.
Shuh shuh u Myntri un ïakynduh ruh bad ki lad pathai khubor, bad hadien kata un sa leit sha ki ïing ki sem jong ki riew paidbah ban ïakren halor ki kam jong ka sorkar u Modi ha kine ki khyndai snem. Hadien kata, un sa don jingïalang sa bad ki katto katne ki nongshong shnong ka jylla bad ki nongseng kam seng jam.
Ha ka Sngi Balang, u Chandrasekhar un bteng ban leit jngoh ïa ki nongshong shnong ha ki ïing ki sem jong ki.
Kane kan dei ka sien kaba ar ba u Myntri un wan sha ka jylla hapoh ki hynriew bnai. Ha u Kyllalyngkot, u la wan ban sdang ïa ka PMKVY 4.0 ha Shillong kaba long kum shi bynta jong ka Skill India Mission.
