Yn tohkit ïa ka jingjia ha Lad Umsyiem; shen yn khot jingïalang bad u IG-BSF: Prestone

Shillong, Jylliew 26:

U Symbud Myntri Rangbah ka Jylla, Bah Prestone Tynsong u la pyntikna ba kan don ka jingtohkit halor ka jingjia kaba la jia ha Lad Umsyiem ha ka miet Sngi U Blei.

“Ngin sa ïaid shakhmat bad ka jingtohkit halor kane. Nga la dep bthah ïa u SP bad ngi dang ap sa tang ïa ka ejahar la ka long na ki paidbah ne ki BSF, ai lad ba ki ujor shuwa ka ejahar ha thanat,” la ong u Bah Tynsong haba kren sha ki lad pathai khubor ha ka Lah Sngi U Blei.

Haba ïathuh ba ki don 4 ngut kiba la mynsaw ha katei ka jingjia ba kynthup ïa 2 ngut na ka liang ki BSF bad 2 ngut ki ‘riew paidbah, u la ong, “Kim lei-lei shuh. Myn hynnin hi ka miet la pynkit noh ïa ki sha Dawki PHC bad hadien kane, la pyllait noh ïa ki ban leit sha la ïing ha kane hi ka miet.”

Haba kylli, u Bah Tynsong u la ong ba u dang ap shuh ïa ki jingtip ba bniah, hynrei katkum ka jingsngewthuh jong u, ka long ba ka kynhun BSF, ka la bat ïa 2 tylli ki kali kiba kit ïa ki jaiñ.

“Hadien kane, la leit rah ïa ki kali sha ktem shipai bad ki nongñiah ki la phet. Katto-katne por hadien, kawei ka kali paidbah ka la sniew hajan ka ktem jong ki bad kumta, ki shipai ki la wan mih na ktem bad kren ïa kine ki briew kaba la ïalam pat sha kane-katai,” u la ong.

Hynrei u Symbud Myntri Rangbah u la pyntikna ba ka jinglong-jingman ïa mynta ka long kaba jai-jai.

Haba jubab la ka don ne em ka jingkhaïi be-aiñ, u Bah Tynsong u la ong, “Ïa mynta, ngim lah ban poi sha kano-kano ka rai naba ka dang kloi palat ban ong eiei halor kata.” 

Halor ka jingïatyngkhuh na ka por sha ka por jong ki BSF bad ki paidbah, u la bynrap haba phai sha ka jingïadei jong ki BSF, pulit bad ki paidbah ha shi lynter khappud jong ka Jylla bad Bangladesh, shen un sa khot biang ïa ka jingïalang bad u IG-BSF.

Ka jingjia kaba wanrah jingsyier biang ïa ki paidbah ka thaiñ khappud bad ka Bangladesh ha thaiñ Dawki ka la jia ha ka miet Sngi U Blei ha kaba ki shipai BSF ki la siat kuli sha suiñ hadien ba ki paidbah ki la wan ïalum hajan ka ktem jong ki kaba don ha Lad Umsyiem hadien ba 4 ngut ki shipai BSF kiba la buaid kyiad ki la khie waleng bad shoh pynmynsaw ïa ki ‘riew paidbah.

Katei ka la jia ha ka por 9.30 baje eiei mynmiet ha Lad Umsyiem kaba hap ha Pynursla Civil Sub Division, East Khasi Hills District.