Shillong, Jylliew 27:
Hadien ba ka Commissioner of Food Safety ka la weng noh ïa ka hukum kaba la mana ban wanrah bad die ïa ki dohkha ba nabar jylla na ka bynta 15 sngi, ki nongtrei ka tnad dohkha-dohpnat ha ka Sngi Ba-ar ki la leit ban peit bniah ïa ki dohkha kiba la wan poi ha Shillong ban pyntikna la ki long ne em kiba biang ban bam.
Kum ban shu kdew hangne, ha ka 8 tarik u Jylliew, ka Commissioner of Food Safety ka la pyntip ba na ka jingpeit bniah kyllum ïa ki dohkha ha kylleng ka Jylla la shem ba 30 na ki 40 tylli ki nongmuna ki dei kiba la khleh da ka dawai ‘Formalin’.
Kane ka dawai ka dei kaba la pyndonkam ha ki mrad kiba la ïap ban pyneh bad pynsah ïa ka doh jong ki, ha kajuh ka por kaba ktah jur ïa ka koit ka khiah jong ki briew kiba bam ïa ki mar ba la khleh da kane ka dawai.
Hynrei ha ka 24 tarik Jylliew, ka Commissioner of Food Safety ka la weng noh ïa katei ka hukum bad la shah biang ban wanrah bad die ïa ki dohkha ba nabar ka Jylla.
Haba ïakren bad ki nongdie dohkha hadien ba la dep peit bniah ïa ki dohkha kiba wanrah nabar, ki la ong na ka liang ka tnad dohkha-dohpnat ki la wan ban peit bniah ïa ki dohkha hynrei kim shym la ai kano-kano ka rai kaba hangto-hangto la ki dohkha ki la long ne em kiba biang ban die ha ïew.
Kumta ki nongdie dohkha ki la ong ba lada ka shim por ban pynbna ïa ka kaiphod kan ktah shi kat dei ïa ki khamtam namar ba ïa kitei ki dohkha ba la wanrah, lada shim por haduh 3 sngi, kata ki hap ban pynphai noh beit ïa ki naba kim long shuh ban die.
“Ngi sngewnguh ïa ka tnad kaba la wan ban peit bniah ïa ki dohkha,” la ong uwei na ki nongdie.
U la ong ruh ba ka tnad kan sa ai ka kaiphod sha ki trai kham shibit bad kin sa shim rai pat kumno ban leh halor kine ki dohkha.
Haba kylli, u la ong, “Myn ha kane ba ki wan peit bniah ruh ngim don jingtip eiei. Ka Commissioner ka la ong ba la shim ïa ki dohkha nangne-nangtai ban peit bniah bad hadien ba ki la wan peit bniah, ka la ïathuh ba ki dang don ki dohkha ba dang don ha jaka peit bniah, don ruh kiba la dep tangba kim shym la batai ha ka sngi aïu ki wan shim. Mynta ka sngi pat lada lap eiei ngi la tip naei ka dohkha ka wan.”
Ha kawei ka liang, u la ong ba lada slem ka kaiphod jong ka jingpeit bniah, kata yn hap ban pynphai noh ïa ka dohkha namar ym lah ban ap haduh 3-4 sngi.
“Ngi khmih lynti ba kin peit bniah hangne bad ai noh hi ïa ka kaiphod hangne tangba kim lah,” u la ong.
Na ka liang ka nongïalam ka Khasi Jaiñtia Fish Wholesaler & Retailer Association (KJFW&RA) ka la ong ba ka hukum ba la pynmih ha ka 24 tarik mynta u bnai ka la dei ban kdew ba ka jingpeit bniah ïa ki dohkha kan long man la ka sngi khnang ban ïoh ka jingshaniah na ki paidbah nongbam.
“Ki shu ong ba la weng noh khlem kano-kano ka jingkular na ka liang ka Sorkar,” ka la ong.
Shuh shuh ka la bynrap ba kham ha shuwa ïa ka jingpeit bniah la leh da ka tnad Food Safety.
