Mawkyrwat, Jylliew 27:
Ki dkhot ka FKJGP Malai Sohmat Unit dang ha kine ki khyndiat ki la ïoh ban bat ïa uwei u dkhar uba la suba jur ba u dei na Bangladesh.
Katkum ka kyrwoh khubor na u samla Leven Shangdiar, President u la ïathuh ba une u dkhar ym lah ban tip nangno u wan bad nangno u mih, hynrei hadien ka jingtohkit bniah ïa u la sngewthuh ba u dei na Bangladesh.
Ka seng hadien kane ka la aiti noh ïa une u dkhar ha ki pulit ka thanat Mawsynram ba kin leh ïa kaba donkam.
Ha kajuh ka por, ka seng ka la kyntu ruh ïa ka sorkar ba ka dei ban peit pyrman bha ïa kumne ki jait jingjia ba wan rung tuh ki khar Bangladesh namar ka la jia bunsien.
Ka seng ka buh ka jingkyrpad ruh ïa ka sorkar ba kan phah peit bha ha ki jaka mih bad jaka rung ïoh lehse ki lah ban ïoh rung ne ïoh don kino kino kiba long ki nonglam lynti ïa kine ki bar jylla khnang ban lait na ki jingma bad ki kam pyntriem.
Ka seng ka la maham ruh ba lada ka sorkar kam shim khia ka seng kam banse ban shim da kiwei pat ki sienjam nangne shakhmat.
