Jawdud kiwei ki Jylla ïa ka Sixth Schedule ha Meghalaya, ong u CEM

U la ai nuksa ïa ki aiñ ka Sorkar Pdeng kum ki aiñ halor ki mar poh khyndew bad khlaw kiba donkam ban pyllait ïa ka Meghalaya.

Shillong, Jylliew 27:

Ka Khasi Hills Autonomous District Council (KHADC) ka la khmih lynti ba ki Autonomous District Council (ADC) kin nang khlaiñ ba kan long ka jingmyntoi lyngba ka jingpynkylla ïa ka Khyrnit Bahynriew (Sixth Schedule), bad na ka liang u Chief Executive Member (CEM), u Bah Pynïaid Sing Syiem u la ong ba kiwei ki Jylla ki bym don District Council ki jawdud ïa ki Jylla kum ka Meghalaya ha kaba ki la wan ruh sha kane ka Jylla ban kylli jingtip kham bniah.

Ïa kane la pynpaw da ki MDC haba ïashimbynta ha ka jingrakhe lyngkhuh snem kaba 71 ïa ka sngi ba pynkha ïa ki ADC lyngba ka Sixth Schedule, kata, ha ka 27 tarik Jylliew 1952 lyngba u nongïalam u Bah James Joy Mohan Nichols Roy, uba la tip ruh kum u kpa ka Sixth Schedule.

Haba ai jingkren ha ka jingrakhe kaba lyngkhot ha phyllaw ka KHADC, u Chief Executive Member (CEM) u Bah Pynïaid Sing Syiem u la kren shaphang ka jingpynkha ïa ka Sixth Schedule katkum ka Article 244A ka Riti Synshar bad ki aiñ kiba la pynkupbor ha ki District Council ban thaw na ka bynta ban ïada bad pynneh pynsah ïa ki riti ki distur bad ki rukom synshar tynrai lyngba ki Hima, ki Raid bad ki Shnong.

U Bah Pynïaid u la ong ba ki don ki MLA bad nongmihkhmat na kiwei ki Jylla kum na Nagaland kiba kwah ban tip shaphang ka KHADC bad ki don ruh na Ladakh kiba la wan shane hadien ba la weng ïa ka Article 370 ha Jammu & Kashmir.

U la ong ba ka jingpynkylla ïa ka Sixth Schedule kam dei ban pyntlot hynrei ban nang aibor bad pynkhlaiñ shuh shuh ban ïada ïa ka jinglong kyrpang jong ka jaitbynriew.

U CEM u la kynmaw burom ruh ïa u kpa ka Sixth Schedule uba dei na ka jaitbynriew Khasi, uba la ïasaid ban pynïoh ïa ki district council na ka bynta ka jingmyntoi ki riewlum kiba long ruh ki ritpaid ha kito ki por ba la ïoh laitluid ka ri India.

Nalor kane, u la kyntu ruh ïa baroh ban ai ka jingtreikam kaba bha tam na ka bynta ka pateng ki ban wan bad ka jingleh burom kam dei ban kut tang ha ka jingbuh syntiew hynrei lyngba ki kam kiba bun.

U la wer ruh ïa baroh ki MDC bad ki nongtrei ka KHADC ban ïatreilang bad ai jingmut kumno ban leh ïa kaba bha tam eh na ka bynta ka jaitbynriew.

U CEM barim uba dei u Nongïalam ka Liang Pyrshah ha KHADC, u la pynkynmaw ïa ka jingïakhih ha u snem 1952 haba u Lat u ai jingithuh ïa ki bym dei Khasi ban shah thung MDC ha KHADC.

U la ong ba dei ban ïeng pyrshah ïa ka jingthmu ban pynrung ïa ka kyntien ‘unrepresented tribe’ namarba ka District Council hi ka dei na ka bynta kiba dei ki trai muluk.

U la ong ba ka jingpynkylla ïa ka Sixth Schedule kam dei ban long ka jingduhnong bad ka dei ka kamram ki dkhot kiba la shahjied ban trei bad nang pynkhlaiñ ïa ka KHADC.

U Deputy CEM u Bah Pynshangaiñlang N Syiem uba pynïaid ïa ka jingrakhe, u la pynkynmaw shaphang ki aiñ ka Sorkar Pdeng ha kaba la kren shai ha ka Sixth Schedule kaba nyngkong ba kino kino ki aiñ ka Sorkar Pdeng ki bym ïahap bad ka Jylla, u Lat ka Jylla undon ka bor ban pyllait noh ïa kum.kita ki aiñ, hynrei hadien ba la wan ka jingpynkylla ïa ka Sixth Schedule habu snem 1972, la bynshet noh ha u President ka ri ym shuh ha u Lat ïa kata ka bor.

U la ai nuksa ïa ki aiñ ka Sorkar Pdeng kum ki aiñ halor ki mar poh khyndew bad khlaw kiba donkam ban pyllait ïa ka Meghalaya.

Kumta u la ong ba lyngba ka jingpynkylla ïa ka Sixth Schedule kaba mynta, ka jaitbynriew kam dei ban duhnong na kane.

U la ong ruh ba ki don shibun ki mat kiba donkam na ka bynta ka jaitbynriew bad kiba ban ïatai sani ha ki rynsan ba dei bad lada donkam dei ban ïatai jar jar ha ki saw kynroh hynrei ban shu ïakren ha surok ka jaitbynriew kan nym ïoh myntoi than.

Ha kane ka sngi rakhe, la pynlong ïa ka jingbuh syntiew ha u motdur jong u Bah Joy ha phyllaw ka KHADC naduh u CEM, Chairman, Leader Opposition, Deputy CEM, ki EM, MDC bad ki nongtrei ka KHADC.