Nongpoh, Jylliew 27:
Ha kawei ka jingjia kaba sngew shyrkhei, la ïathuh ba kawei ka longkmie ka la duh noh ïa la ka jingim hadien ka jingsuba ba ka la shah tied shah shoh ha la u lok ha ïing sah ka jong ki kaba don ha Kyrdemkulai, Ri Bhoi District.
Kumba la ïoh jingtip, la ïathuh ba katei ka jingjia ka la jia ha ka miet jong ka 25 tarik mynta u bnai ha kaba ki bor pulit ki la lap ïa kitei shijur kiba la thiah lyngktar ryngkat ka jinglyngkien jong ka snam hapoh katei ka ïing sah ka jong ki.
Kumta ki pulit ki la pynkit noh ïa kine baroh shi kurim sha Umsning CHC na ka bynta ban ïoh ïa ka jingsumar. Pynban na ka liang ki bor katei ka jaka ai jingsumar ki la pynbna ba katei ka longkmie kaba la tip kyrteng kum ka Beena Sunar ka la dep khlad lypa, katba u lok jong ka pat uba la suba donkti ha katei ka jingjia ba la tip kyrteng kum u Keshab Sunar u don hapdeng ka jingmynsaw jur bad ka jingbym tipbriew bad la pynkynriah noh sha ki jaka ai jingsumar sha nongbah Shillong.
Ïa ka met kaba sah jong ka Beena Sunar la pynkit noh sha Civil Hospital Nongpoh na ka bynta ban leh ïa ka post mortem.
La ïoh jingtip ruh ba na ka liang ka hynmen jong ka Beena Sunar, ka la ujor da ka ejahar ha thanat Nongpoh halor ka jingkhlad noh ka para jong ka. Na ka liang ki pulit ki la shimti ruh ïa ki tiar kiba la suba pyndonkam ha katei ka jingïashoh ïadat bad ka jingtohkit halor kane ka jingjia ka dang ïaid shakhmat namar kumba long mynta, la ong ba utei u lok (u Keshab Sunar) uba la suba donkti halor kane ka kam sniew, u dang don hapdeng ka jingbym tipbriew bad jingshah sumar.
