Shillong, Jylliew 27:
U Myntri Rangbah ka Sorkar Jylla, u Conrad K Sangma, u la kular hakhmat ki nongpynmih phlim hapoh ka jylla kiba don ha ka lama jong ka Meghalaya Film Makers Association (MFMA) ba ka sorkar jong u kan shna shwa saw tylli ki cinema hall hapoh ka jylla kum shi bynta ban kyntiew ïa ki phlim.
Kane ka jingkular u Conrad ka dei ha ka jingïakynduh bad ki nongpynmih phlim hapoh ka jingïalam u Bah Commander Shangpliang kum u President ha kamra treikam jong utei Myntri Rangbah ha Secretariat kaba la long mynta ka sngi ka 27 tarik Jylliew, 2023.
U Bah Commander u la ong ba lada ka sorkar ka shna cinema hall ïa ki phlim Khasi kan sa poi ka por ba kin kamai da ki klur tyngka namar haduh mynta ka don tang kawei ka cinema ha shillong kata ka Bijou Cinema bad kan long ka lad ai kam ai jam ïa ki samla.
U la ong ba lada ki phlim Khasi ki kamai da ki klur tyngka ka sorkar ruh kan ïoh khajna na ka GST.
Nangta, u la ong ba ki nongpynmih phlim haduh mynta ki dang shaniah tang ha kawei ka cinema hall kata ka Bijou Cinema. Hynrei lada shna ha baroh ki district ka jingkamai kan long beit da ki klur tyngka.
U la ïathuh ba ha kane ka jingïakynduh, u Conrad u la kular ban shna shwa saw tylli ki cinema kynthup ha nongbah Shillong bad ïa kiwei yn pyndep hapoh kane ka san snem.
Nalor kane, u Bah Commander u la ïathuh ba ka seng ka la kyrpad ban ai subsidy ïa ki nongpynmih phlim khnang ba ki lah ban pynmih shibun tylli ki phlim.
Ha kajuh ka por u la kyrpad ba ka sorkar kan aiti kyrpang ha kano kano ka tnat ba kan peit ïa ki phlim hapoh ka jylla namar haduh mynta ka pynkulmar ïa ki nongpynmih phlim namar kim tip ka tnat aïu ba kan peit ïa ki.
Nalor kata, u la pyntip ruh ba ka sorkar ka dei ban ai bor ha ki nongpymih phlim ban die ïa ki tiket namar ki sngewthuh ma ki ban die ïa ki tiket haba ki la pynlut kham bun ka pisa kumba leh ha kiwei ki jylla.
Namar kata, u la kyrpad ruh ïa ka sorkar ba kan shna noh ïa ka film policy na ka bynta ban wanrah ïa ka jingpynïaid beit ïaid ryntih ha ki kam shna phlim hapoh ka jylla.
