Jowai, Jylliew 27:
Ka Dorbar Shnong Khanduli ha ka Sngi Ba-Ar ka la leit ban ujor sha u Deputy Commissioner jong ka West Jaiñtia ha kaba la kynnoh ba ki Karbi ki la pom dusmon ïa ki dieng ha kawei ka khlaw shnong kaba tip kum ka Samynthoo.
Katkum ka jingujor, ka Dorbar Shnong Khanduli ka la ong ba ki Karbi ki la pom pathar ïa ki dieng ha ka 22 tarik Jylliew ryngkat ka jingsynran lang ki pulit jong ka Assam bad ka seng KSA na West Karbi Anglong.
U Waheh Shnong ka Khanduli, u Bah Yooshida Nongspung u la ïathuh ba katei ka khlaw kaba dang hap hapoh u pud u sam jong ka Dorbar Shnong Khanduli bad ka dang hap ruh hapoh ka jingpeit jong ka Jaiñtia Hills Autonomous District Council (JHADC) bad ka don ïa ka Land Holding ba pura.
U la ïathuh ba na ka liang ka shnong kam tip na kaei ka daw ki briew na Karbi ki la wan ban pynjulor ïa kane ka khlaw kaba ki ju pyndonkam man la u snem. Ka Dorbar Shnong ka la kyrpad ïa ka sorkar ban shimkhia halor kane khnang ban lait na ka huri-hura.
