Shillong, Jylliew 27:
Ka Sorkar Jylla ka lah ban pynmih biang ïa ka hukum ban khang ïa ka jingwanrah dohkha nabar ka jylla lada lap ne shem ba ka dang don ka jingai biang ïa ka dawai ‘Formalin’ ha ki dohkha.
Ïa kane la ïathuh da ka Myntri ka tnat ka koit ka khiah ka Kong Ampareen Lyngdoh kaba dei ruh ka nongaiktien jong ka Sorkar Jylla ha ka Sngi Ba-ar haba kren sha ki lad pathai khubor.
“Lada lashai ngi leh ïa ki test bad ngi shem ba ka jur bha ka jingai ïa ka dawai Formalin ha ki dohkha, kumta sa shisien ngin hap ban pynjari biang ïa ka hukum ban khang ban wanrah ïa ki dohkha nabar ka jylla,” la ong ka Kong Ampareen.
Kane ka jingkren jong katei ka Myntri ka la mih hadien ba ka sorkar jylla ha ka 24 tarik mynta u bnai ka la weng noh ïa ka jingmana kaba khang pyrshah ban wanrah ïa ki dohkha nabar ka jylla.
Nangta, ka la ong ruh ba nangne shakhmat yn bteng ïa ka jingleh test ïa ki dohkha kiba wanrah na shabar ka jylla.
Shuh shuh ka Myntri ka la ïada ruh halor ka jingkylli la ka don ka jingbym ïa pyntip eiei hapdeng ka tnat Food Safety bad u Myntri Rangbah ka jylla.
Lah ban pynkynmaw ba ha ka Lah Sngi U Blei, u Myntri Rangbah u la ong ba ka sorkar kan bteng ban khmih bniah ïa katei ka jingjia ha shwa ban weng noh ïa ka jingpynjari ïa ka jingmana ban khang wanrah ïa ki dohkha kiba nabar ka jylla, watl a ïa katei ka jingmana la dep ban weng noh ha ka 24 tarik u Jylliew.
“U Myntri Rangbah u la jubab ïa ka jingkylli jong ki nongpathai khubor ïa kaei ka jingsngew jong ka sorkar jylla halor katei ka kam bad ka jingkren u Myntri Rangbah ka long kaba shai ba ka jingmana ban khang kan ïai bteng lada shem biang ba ka don ka jingai ïa ka Formalin ha ki dohkha la ka long khyndiat ne shibun namar ka Formalin ka dei ka bym long ban pyndonkam. Kumta u Myntri Rangbah u la ong, ba lada lashai la lap ba la leh biang ha ka jingleh tes da ka tnat Food and Safety kumta yn hap ban weng mardor ïa kitei ki dohkha,” la ong ka Kong Ampareen.
Ka Myntri ka koit ka khiah ka la ïathuh ba ka la ïoh ban ïakren bad ki nongkhaïi bad nongdie dohkha bad ki la pyntip ba ki la ïoh ïa ka syrnod na ka sorkar Karnataka.
“Haei katei ka jingai dawai ïa ki dohkha ka la jia bad phi hap ban tip kum ki nongdie dohkha. Lada nga wanrah eiei hapoh ïew bad nga die ha phi, nga hap ban pyntikna ba ka dei ban don ka jingshim ïa ki lad kiba shngaiñ,” la ong ka Myntri bad ka bynrap “Ki kyndon jong ka jingpynkheiñ ïa ka Food Safety yn hap ban pyntreikam”.
Ka la ïathuh ruh ba la bthah ïa ki Food Safety Inspector ba kin wad katno sngi ka shim por ban pynpoi ïa ki dohkha na kiwei pat ki jylla shapoh ka jylla Meghalaya.
“Nga la kylli na ki nongkhaïi bad nongdie dohkha ba katno sngi kan shim por ïa ki trok kiba mih na Karnataka ban pynpoi ïa ki dohkha sha Shillong. Nga la ong ïa ki ba kan shim por kumba 15 sngi hynrei kila pynshai ba ka shim por tang 4 sngi. Kane ka dei kaei kaei kaba ngan tip bniah bha, kumta ki Food Safety Inspector ki dei kiba biang tam ban leh ïa katei,” la ong ka Kong Ampareen.
Ka la ong ba ka sorkar ka la bthah ïa ki ba kin shimkhia thikna ïa kane ka kam bad ban kin leh ïa kaba donkam ha ka jingtohkit ka jongki ban lap, khamtam haba kila kam ba ka shim por tang 4 sngi bad wat hapoh 4 sngi ruh ka jinglong jingman jong ka dohkha ka long kaba lyngkot bha. Kumno ka dohkha ka ïai bteng ban i kum kaba dang bha wat ka la don bun sngi ka dei ka jingkylli kaba eh bha.
Nalor kata, ka la kyntu ruh ïa ki paidbah ba ki dei ban bam ïa ki dohkha kiba pynmih hi na ka jylla bad ki dei ban long kiba husiar ban bam ïa ki dohkha kiba wanrah na ka lynti kaba jngai bah.
