Shillong, Jylliew 27:
U MLA ka North-Shillong, Bah Adelbert Nongrum ha ka Sngi Ba-ar u la pynpaw ka jingbym ïahap halor ka ‘Office Memorandum’ kaba la pynmih ha ka 14 tarik u Jylliew mynta u snem hadien ba u la lap ïa ki jingduna ha ka.
“Hadien ba nga lap bad shem ïa ki jingduna haba ïadei bad ka ‘Quantum of Reservation’…hangne la paw lyngba ka OM ba kata ka ‘Reservation of Post’ ka ïatyngkhuh bad ka rai jong ka bhah thung kam thung jam ka Jylla jong ka 12 tarik u Kyllalyngkot, 1972. Katkum kane ka rai ha u 1972 ka dei ka ‘Reservation of Vacancy’,” la ong u Bah Nongrum haba pynshai ïa kane ka bynta.
Haba pynpaw ka jingkhmih lynti ba ka OM kan long kaba bit ba biang, ha kawei ka liang, u la shem pynban ba haduh mynta ka Sorkar MDA ka dang ïalam bakla ïa u paidbah.
“Hynrei nga ong tang kawei…ki lah ban ïalam bakla ïa ki samla ne u paidbah, hynrei ym ïa nga,” u la ong.
U Bah Nongrum u la ong ruh ba haba ïanujor ïa OM (2023) bad ka OM jong ka 10 tarik u Jymmang, 2022, la lap ba ka ‘Guideline B4’ ka ong ba ym dei ban don jaka thylli ha ka ban pyndep ïa ka ‘Roster’, hynrei haba phai pat sha ka OM jong ka snem 2023, la pynjah noh ïa kane ka bynta.
“Haba nga la leit lyngba ka ‘Central Guideline’, kane ruh ka kren kumjuh,” u la ong.
Halor ka jingpynkhreh na bynta ka ‘Roster’ ban tip ïa ka rukom thep kam, u la ong ba lada don kano-kano ka thup kyrdan ka bym lah ban thep ïa ka kam, kata ym lah ban pynsah thylli khlem da pyndap eiei ha kata ka thup kyrdan.
“Katkum ha ka OM 2023, kane ka la jah noh, hynrei haba phai pat sha ka rai jong ka 12 tarik u Kyllalyngkot, 1972, ka kren shai beit ba lada ym don ki kyrtong kiba ibit ha ka thup jong ki, dei ban pyndap da mano-re-mano,” u la ong da kaba kynnoh ruh ba katei ka dei da ka jingthmu kaba don eiei sha lyndet.
Haba ai nuksa ïa ki jingpynbna lait kam jong ka MPSC na bynta ka MCS, u MLA u la ong ka bhah na bynta u Khasi-Jaiñtia ka long tang 11 tylli katba na bynta kiwei pat ka long haduh 14 tylli.
Kumjuh ka jingpynbna lait kam ka MPSC na bynta ka LDA ha Secretariat, na bynta u Khasi-Jaiñtia ka long tang 38 tylli katba kiwei pat haduh 43 tylli.
Haba ïadei bad ka jingpynbna jong ka Central Recruitment Board, jong ka tnad pulit ka Jylla, na bynta ka kam ‘UB Constable’ jong ki Khasi-Jaiñtia ka long tang 107 tylli katba kiwei pat haduh 122 tylli.
Ha kajuh ka por, ha ka ‘AB Constable’, na bynta ki Khasi-Jaiñtia ka long tang 222 tylli, katba kiwei pat ka long haduh 239.
Haba phai pat sha ka jingpynbna lait kam ka MPSC na bynta ka kam ophisar ha ka tnad Veterinary…na bynta ki Khasi-Jaiñtia ka long tang 9 tylli katba kiwei pat haduh 13 tylli.
“Nga kwah buh ka jingkylli ba lada la pynjah noh ha ka OM jong ka 14 tarik u Jylliew, 2023 haba ïadei bad ka ‘Detail of Backlog Reserved Vacancy’, balei pat kine ki dang neh haduh mynta. Lada ka long ha kata ka dur, la ka dei kumba la pyndam noh na ka OM ba kam don shuh kata ka jingkyrtiang dien hynrei ka la dei beit nangne shakhmat, ïa kine ruh ka Sorkar ka dei ban shim ka jingkitkhlieh bad ka dei ban pynbna biang ne pyndam noh ïa kane,” la ong utei u nongmihkhmat.
Ha kawei pat ka bynta, u la ong ba katkum ka ‘Guideline F’ ha ka kyrdan jong ka District ne Sub-Division lyngba ka OM jong ka 18 tarik u Nohprah, 1972, kane kan wanrah ym tang ka jingoh shiliang hynrei ka jingma bad ka jingmynsaw.
“Kane ha ka jingshisha la kren haba ïadei bad ka 40-40% na bynta ki Khasi-Jaiñtia bad Garo, hynrei la wanrah pat ha kawei ka bynta ban kynthup lang ïa ka ‘Reservation of 80%’. Ïa kane yn pyntreikam 80% na bynta ki Garo ha Ri-lum Garo baroh kawei, katba na bynta ki Khasi-Jaiñtia yn pyntreikam 80% tang ha Jowai bad Shillong,” u la ong.
Shuh shuh u Bah Nongrum haba buh jingkylli ïa ka Sorkar ba yn leh kumno pat na bynta kiwei pat ki distrik kum ka West, South West, Ri-Bhoi bad kiwei ki bynta jong ka Ri-lum Jaiñtia, u la bynrap, “Balei la paw tang ha Jowai bad Shillong, mano ban shim ka jingkitkhlieh halor kane ka OM bathymmai, kane ka long ka bym ïahap.”
