Jowai, Jylliew 27:
Ar ngut ki suba nongkhaïi drok kiba la tip kyrteng kum u Romeo Bareh bad u Hadin Da U Timung ki la shah kem ha ki pulit ka West Jaiñtia Hills District ryngkat u heroin uba khia 1.41 gram.
Kat kum ka khubor na u Superintendent of Police ka West Jaiñtia Hills District, u la ïathuh ba ïa kine ki briew la kem na Ïawmusiang Jowai mar pyrshah ka shlem treikam DC ha ka Sngi Ba-ar.
Nangta, u la ïathuh ba hadien ba la ïoh jingtip shaphang kine ar ngut, la phah ïa ki pulit kyrpang ha ka por kumba 3:00 baje noh phai sngi bad hadien kata la ïoh bat ïa ki.
U la ïathuh ba ha ka jingkhynra la lap 21 tylli ki thyrnia bad uwei u tyndong rit (vile) bad haba phah peit bniah (test) ïa une u tyndong la pyntikna ba la don ïa u Heroin ba khia 1.41 gram.
Kine baroh ar ngut ki dei ki nongshong shnong ka Jowai. Kumta la pynngat ïa ki ha kyndon jong ka aiñ Narcotic Drugs and Psychotropic Substances Act, 1985.
