Nongpoh, Jylliew 27:
Kawei ka ïing ka la pluh bad ka ingkhong khait bad hynriew ngut ki briew ki la mynsaw ha ka Lah Sngi U Blei na ka jingpom u pyrthat ha ka shnong Umsohlait, Ri Bhoi distrik.
Katkum ka FIR ba la ai da u Rangbah Shnong sha ki pulit ka thanat Umsohlait, la ong ba hynnin ka sngi ha ka por kumba 3 baje nohphai sngi, ka ïing jong ka Kong Kristina Mynsong kaba don ha ka Dong Kim Heh ka la kem ding bad ingkhong khait na ka jingpom pyrthat. Na kane ka jingpom pyrthat, ki jingdon jingem ha kane ka ïing ruh ki la julor bad duh lut.
Nalorkata, u Rangbah Shnong u la ong ba ki la don hynriew ngut ki briew ha katei ka ïing bad kine ki la mynsaw, bad kine ki kynthup ïa u Bah Johnson Lynshing, Kong Martha Shadap, i heprit Driamizaca Shadap, Banaibor Lyngdoh, u heprit Kyrshanborlang Mynsong, bad u heprit Banraplang Khongsam.
U Rangbah Shnong u la ong ruh ba ïa kitei ki hynriew ngut la pynkit noh sha Hopsital ban ai jingsumar, bad kiba la kham mynsaw ki long Bah Johnson Lynshing, i heprit Driamizaca Shadap bad u heprit Kyrshanborlang Mynsong.
Shuh shuh u la ong ba ka jingduh na ka jingpluh jong katei ka ïing ka la kot sha kumba T. 3 lak.
