Shillong, Jylliew 27:
Ka Kynhun Myntri ka Sorkar Jylla, ha ka Sngi Ba-ar ka la ai jingmynjur ban weng noh ïa ka bynta kaba don ha ka Office Memorandum (OM) jong ka Reservation Policy jong u snem 1974 kaba ailad ban ïoh kam ïa ki Garo ki bym dei na ka jylla Meghalaya.
Haba kren sha ki lad pathai khubor hadien ka jingïalang ka Kynhun Myntri, ka Myntri Sorkar, ka Kong Ampareen Lyngdoh, kaba dei ruh ka Chairperson jong ka committee halor ka roster system, ka la ong ba ïa ki kam ba thylli kiba la buh na ka bynta ki jaitbynriew Garo, yn lah ban pyndap tang da ki jaitbynriew Garo kiba sah ha jylla Meghalaya.
Ka Kynhun Myntri ka la mynjur ruh ban pynkylla ïa ka Office Memorandum kaba mynshwa halor reservation policy kaba pynmih ha ka 12 tarik Kyllalyngkot, 1972 kaba ong ba ki kam kiba thylli kiba hap ban pyndap da kaba pynbna dei ban pynbna 9 tylli, kan nym don shuh mynta namar ba ïa ka Roster Point ha ka Reservation Policy hap ban bud.
La ïathuh ruh ba ïa ka office memorandum kaba pynmih ha u snem 2020 na ka bynta kiba duna dkhot met la pynkylla noh da ka jingpynmih ïa ka OM halor ka reservation roster kaba 14 tarik Jylliew, 2023.
