Shillong, Jylliew 27:
Ki shipai BSF jong ka 4th Battalion ha ka Lah Sngi U Blei ki la ïoh kem ïa san ngut ki nong Bangladesh bad san ngut ki nong India ha ka surok Dawki-Amlarem kiba la rung be-aiñ sha India na Bangladesh lyngba u khappud na West Jaiñtia Hills.
Katkum u kyrwoh na ki BSF ha ka Sngi Ba-Ar, la ong ba kitei ki nong Bangladesh ki dei kiba shong ba sah ha Sylhet bad Habibaganj. Haba la tohkit ïa kine ki san ngut ki nong Bangladesh, ki la ïathuh ba ki la rung sha India da ka jingthmu ban wan shong duh ha kane ka Ri. Ki BSF ki la kem ruh ïa u nongñiah ïa ka kali ba la kit ïa kitei ki briew.
Na ka liang ki BSF ki la aiti ïa kitei ki 10 ngut ki briew sha ki pulit ka thanat Dawki, West Jaiñtia Hills ban leh ïa kaba donkam.
Ha kawei pat ka liang, ki BSF ki la ïathuh ba mynta u snem, ki la kem haduh 26 ngut ki nong Bangladesh naduh u bnai Kyllalyngkot hadien ba ki la rung tuh sha India da ka jingthmu ban wan shong wan sah sha India.
