Shillong, Jylliew 27:
Ka Bharatiya Janata Party (BJP) ha ka Sngi Ba-ar ka la kren shai ba u Myntri Rangbahduh ka ri, u Narendra Modi un sa leit jngoh ïa ka Manipur bad kum shi bynta ban khmih bniah ïa ka jinglong-jingman, u Myntri Khynnah ka tnad kam pohïing ka Sorkar Pdeng, u Nityanand Rai u la don ha katei ka Jylla la 20 eiei sngi mynta.
“Uwei na ki nongïalam ba rangbah ka seng bad Myntri ka Sorkar Pdeng, u Amit Shah u la leit jngoh ïa ka Manipur. Naduh 20 sngi, u Myntri Khynnah ka tnad kam pohïing ka Sorkar Pdeng, u Nityanand Rai u la sah ha katei ka Jylla,” la ong u dkhot ka Legislative Council ka BJP bad Chief Whip ka ïingdorbar thawaiñ ka Bihar, u Dilip Kumar Jaiswal haba kren sha ki lad pathai khubor.
Haba kylli halor ka jinglong kumjuh jong ka Manipur wat hapdeng ka jingsah jong u Rai ha katei ka Jylla bad la u sngew dei ne em ïa u Myntri Rangbahduh ka ri ban leit jngoh ïa katei ka Jylla, u Jaiswal u la ong, “Hooid, u Myntri Rangbahduh un sa leit sha Manipur. Nga dei tang u nongmihkhmat jong ka seng, ngam lah ban ong lano ka tarik hynrei u Myntri Rangbahduh u tip shaphang kane ka jingeh bad u ieid bha ïa ki nongshong shnong ka thaiñ Shatei Lam Mihngi.”
U Jaiswal uba la buh jingkylli ba ha ki 70 snem ba la leit jong ka Sorkar Congress, katno sien u Myntri Rangbahduh u la wan jngoh ïa ka thaiñ, u la ong ba ha ki 9 snem hapoh ka jingïalam ka seng, u Myntri Rangbahduh u la wan jngoh la palat 50 sien ïa ka thaiñ Shatei Lam Mihngi.
Haba kylli, u la ong, “Ha ka por ba la ïakren ban weng noh ïa kyndon 370 na Kashmir, kiba bun kiba ong ba lada weng ïa kane, ka ri baroh kawei kan ing bad hadien kane, la pyndam noh ïa ka 370 na Kashmir. Kumta ka jinglong-jingman ka ïapher na kawei ka Jylla sha kawei pat.”
Ha kajuh ka por, haba kdew ba ka Manipur ka don la ka jong ka jingsngew, kumjuh ka Meghalaya (ka don la ka jong ka jingsngew), u Jaiswal u la ong ba ka Sorkar u Modi ka ngeit bad burom ruh ïa ki jingsngew ki ’riewlum jong baroh ki Jylla ka thaiñ Shatei Lam Mihngi.
Shuh shuh u la bynrap, “Ngi ruh ngi don ka jingsngewkhia kaba jur halor ka jinglong-jingman ha Manipur bad ngi dang pynkhreh ïa kawei ka mat treikam (FORMULA) ban pynbeit ïa kane ka jingeh bad burom ïa ki jingsngew jong baroh ki nongshong shnong.”
Kum ban shu kdew hangne, u Myntri Rangbahduh ka ri, u Narendra Modi haduh mynta um pat shym la kren eiei halor ka jingjia ha Manipur kaba la sdang naduh ka 3 tarik u Jymmang.
