Shillong, Jylliew 27:
U nongmudui ïa ka mukotduma kaba ïadei bad ki karkhana thang dewïong be-aiñ ha ka Sngi Ba-ar u la pynpaw ha ka Meghalaya High Court ba ki don bun kiba kum kine ki karkhana, khamtam ha West Khasi Hills, kiba la treikam khlem kano-kano ka laisen ne ka jingïoh jingbit.
Ha kane ka sngi, ka High Court ka la ailad ïa u nongmudui ban wad ïa ka jingdonkti jong ki katto katne ki heh pulit, khamtam ha ka thaiñ Shallang, ha kaba ïadei bad ka jingkit ïa u dewïong ba la tih be-aiñ sha kitei ki karkhana.
Ha kajuh ka por, u lah ruh ban wad la ki trok kiba kit ïa u dewïong ba la khlong be-aiñ ki poi ne em sha ki karkhana thang dewïong kiba treikam khlem laisen.
Nalorkata, ka High Court ka la ong ba u nongmudui un wad ruh mano kita ki briew kiba donkti bha ha ka jingpynïaid ïa kitei ki kam be-aiñ baroh.
Na ka liang ki muktiar ka sorkar jylla ki la ong ba kane ka mukotduma ka dei ban mih ha ka taïew ban wan namar ka don sa kawei pat ka mukotduma kaba ïadei bad ka jingkit dewïong be-aiñ kaba ka High Court kan shong bishar.
“Ka rukom leh jong ka sorkar jylla ka dei beit ban kiar na kiba kum kine ki kam bad ban khmih lynti ba kin don da kiwei pat kiba kham bha. Hynrei, ha kaba ïadei pat bad ka jingleh pyrshah da kaba tyngeh ïa ki kam be-aiñ, ym ïohi ba la leh eiei,” la ong ka High Court.
Ha kawei pat ka liang, ka High Court ka la ong ba namar la dep ban thung ïa u Justice B.P. Katakey, Nongbishar ba la shongthait, ban peit la ka sorkar ka la pyntreikam pura ne em ïa ki hukum ka National Green Tribunal (NGT) ba la pynksan ruh da ka Supreme Court, ha kaba ïadei bad ki kam dewïong, lah ban aiti ha u Justice Katakey hi ban tohkit ïa ki briew kiba don bynta ha ka jingtih bad jingkit dewïong be-aiñ bad ka jingpynïaid ïa ki karkhana thang dewïong be-aiñ ba kynthup ruh ïa ka jingïoh jong kine ki karkhana ïa u dewïong ba la tih be-aiñ.
Ha kane ka jingtohkit, ïa ka jingdonkti jong ki briew kiba don ha ka sorkar (Administration), khamtam ki pulit, bad halor u Officer-in-Charge (OC) ka thanat Shallang, lah ban wad bniah.
