Mawkyrwat, Jylliew:
Ka shlem treikam u Deputy Commissioner, South West Khasi Hills District, Mawkyrwat ka pyntip sha ki nongshong shnong kiba la don ïa ki Aadhaar tangba kiba khlem pyndonkam shuh ïa ki mobile number katkum ki Aaadhar ba ki don ba kin leit pynthymmai noh da ki mobile number kiba ki dang pyntreikam na ka bynta ban ïoh ïa u OTP ban pynshisha ïa ki Aadhaar khnang ban pynïasoh bad ki lad jingmyntoi (scheme) ba ïoh na ka sorkar.
La bthah ruh ba lada ki leit ban pynthymmai ïa ki mobile number ki lah ban leit ha ki jaka ba pynrung kyrteng Aadhaar kaba don ha shlem treikam DC, BDO Office Mawkyrwat, BDO Office Ranikor bad kumjuh ruh ha ka por ba ki Aadhaar Operator ki wan pynrung kyrteng ha ki shnong.
Ha ka por ba ki leit pynthymmai ïa ki mobile number ki dei ban wan hi da lade da kaba rah ïa ka Aadhaar Card lem bad ki mobile number ba ki dang pyntreikam ha kitei ki shlem treikam ba la kdew.
