Shillong, Jylliew 28:
Ka Voice of the People Party (VPP) ka la thoh bad kyrpad ïa u Myntri ka tnat Home (Civil Defence & Home Guards) u Bah Comingone Ymbon ban siew noh ïa ka tulop kaba sahteng mynta la saw bnai jong ki pulit Home Guards.
Ha ka shithi ba la phah sha u Myntri, u General Secretary ka VPP u Dr Ricky A.J Syngkon u la pyntip ba ki pulit home guards kim pat shym la ïohpdiang ïa ka tulop mynta la saw bnai kaba la buh jingeh shi kat dei ïa ki ban pyndap pynbiang ïa la ka ïing ka sem.
U Dr Ricky u la ong ba kane ka long shisha ka kam ka bym shym la pyrkhat ne don jingsynei shuh na ka liang jong ka tnat kaba dei peit na ka bynta ban peit ïa ka bit ka biang jong kine ki pulit kiba la ai ka jingshakri met bad mynsiem ban beit ki kam ki jam.
