Shillong, Jylliew:
Kum shi bynta ban pynsngewthuh paidbah halor ka jingma ba wan na u drok, ka National People’s Party (NPP) Women’s Wing, ka la pynlong da ka Inter-College Debate Competition halor ka sobjek ‘Drug Policies to combat the menace of Drug Abuse and Illicit Trafficking’ ba la pynlong ha State Convention Centre, Shillong.
Kum ban shu kdew ha man ka 26 tarik Jylliew la ju rakhe kum ka sngi pyrshah drok lane ka ‘International Day against Drug Abuse and Illicit Trafficking’ ban kyrsiew thiah ïa ki paidbah halor ka jingma na u drok.
Ha Shillong, ïa ka Inter-College Debate Competition la pynlong da ka NPP Women’s Wing bad ha kane ka sngi ki samla pule na St. Anthony’s College, Umhyrpi College, Martin Luther Christian University (MLCU), Synod College, St Mary’s College bad na Women’s College Shillong ki la wan shim bynta.
Haba ïathir halor ka jingma kaba mih na u drok, ka thong jong ka Inter-College Debate Competition ka dei ban ïathir ïa ki lad lynti na ka bynta ban rat dyngkhong ïa u drok na ka imlang sahlang da kaba wanrah ïa ki kpait saiñ kam (policy) ban tem ïa ka jingkhaïi drok bad kumjuh ruh ki lad lynti ban ïarap ïa kiba la kyrni ha u drok.
Ki nongïashim bynta ha kane ka jingtyrko nia ki la kren halor ki daw ba kyrni drok ki paidbah bad ki kamram ba ka imlang sahlang ka don bynta ban leh ban wanrah ka jingjop ha ka thma pyrshah drok.
Ka samla Admita Bhattacharjee jong ka St. Mary’s College, Shillong ka la jop ha kane ka Inter-College Debate Competition bad ka la ïoh ïa ka syrnod bad ka song pisa T.10,000 ïa ka kyrdan la ïoh da ka samla Debargha Sarkar jong ka St Anthony’s College ha ryngkat ka syrnod bad ka pisa T.7,000 bad ïa ka kyrdan ba lai la ïoh da Pynskhem L. Mawnai jong ka Umshyrpi College ha ryngkat ka syrnod bad ka pisa T.5,000.
U Myntri ka tnat pule puthi Rakkam A Sangma u la leit pynshongkun kum u kongsan bad ka MLA jong ka Sutnga Saipung ka Kong Santa Mary Shylla ka la long kum ka symbud kongsan.
Haba kren ha kane ka sngi u Rakkam u la ong ba ka long kaba donkam ban pynlong ka jingsngewthuh paidbah halor ka jingma kaba mih namar ka jingkyrni drok bad kumno ban rat dyngkhong ïa u drok na ka imlang sahlang.
U Rakkam ula pynpaw ka jingdonkam ka pule puthi na ka bynta ban rat dyngkhong ïa u drok napoh ka jylla.
Ki nongbishar ha kane ka Inter-College Debate Competition ki kynthup Dr. Pakha Tersia, MD Psychiatry, Deputy Superintendent of Police Subir Sangma bad u Bah David Laitphlang u President ka Shillong Press Club (SPC) bad ïa ka jingiakop la pynïaid da u MDC bad u NPP Youth Wing Spokesperson u Bah Bajop Pyngrope.
