Shillong, Jylliew 28:
Ka Khasi Hills Autonomous District Council (KHADC) ha ka Sngi Balang ka la rai ban pyntreikam noh da ka jingsiew ‘online’ ïa ka professional tax.
Ïa kane la pyntip da u CEM ka KHADC, Bah Pynïaid S Syiem haba jubab halor ka ‘motion’ ba la wanrah ha ka sngi pynkut noh ïa ka dorbar lyïur jong ka Council. Ka KHADC ka la ïoh lum palat T.10 klur ka professional tax ha ka shisnem.
“Ka jingpyntreikam ïa kane ka rukom siew ba thymmai kan ïarap shi kat dei eh ban tehlakam ïa ka jinglait tuh ka khajna bad ngi kyrmen ba kane kan ïarap ban nang kyntiew ïa ka jingïoh lum ïa ka professional tax sha ka T.20 klur ha ka shi snem,” u la ong.
Nalor kane, u la pyntip ruh ba ka Executive Committee kan sa khot mardor ïa ka jingïalang jong ka tnat na ka bynta ban pyntreikam noh ïa kane ka rukom treikam ba thymmai.
Katkum ka jingong jong u, ka Council ka don jingthmu ruh ban pyndonkam noh da ki kor Computer ha kaba buh jingkheiñ jingdiah jong baroh ki tnat pynmih pisa jong ka Council.
Shuwa kane, haba kyrshan ïa ka ‘motion’ ba la wanrah da u MDC ka Nongpoh, Bah Balajied Ranee bad u Nongïalam ka Liang Pyrshah, Bah Titosstarwell Chyne u la ong ba ka khajna ba la lum na ka professional tax ka la kot T.13 klur, hynrei kane ka rukom lum khajna ba mynta ka dei kaba pynshlur ïa ka jinglait tuh ki khajna.
“Namar kata, nga sngew ba ngim dei ban pynshlur ban siew ïa ka professional tax da ka pisa. Nga kyrpad ïa ka Executive Committee ban khmih sani bha ïa kane ka kam,” la ong u Bah Titos.
Halor ka kam ba ïadei bad ka jingai Trading License, u CEM u la ong ba ka tnat Khaïi jong ka Council kam dei ïa ka ban peit kum ka tnat pynmih khajna, namar “Lada ngi ong ba ka tnat ka dei na ka bynta ka jingpynmih khajna, kan mut ba ngin hap ban ai Trading License sha baroh kiba wan applai na ka Council,” u la ong.
U Bah Pyniaid u la ong ba ka EC ba thymmai ka la rai ban nang pynkhlaiñ ïa ka tnat Enforcement jong ka tnat Trade.
“Ngim dei ban ailad ïa ki pulit Enforcement ba kin shu shong ha ophis, hynrei kin pyntikna ba kin leit sha ki jaka ïew ban talasi ïa ki kam khaïi be-aiñ,” u la bynrap.
Ha kajuh ka por, u CEM u la ong ruh ba shen un sa khot ïa ka jingïalang bishar kam bad baroh ki tnat khnang ban lah pynjanai ïa ka jingtreikam jong ka Council.
