Shillong, Jylliew 28:
U President ka Khasi Students’ Union (KSU) samla Lambokstarwell Marngar u la pynpaw ïa ka jingartatien ba ka jingïakynad ha Manipur lehse ka dei ka rukom pyrkhat ban pynïaumsnam para ’riewlum.
“Kum ka seng kaba don lang ha ka shatri jong ka North East Students’ Organisation (NESO), ka don ka jingsngew ktah lada pyrkhat namar hapoh NESO ngi ju ïakren ïa ki jingeh ba ki trai-ri trai-muluk jong ki Jylla bapher-bapher ka thaiñ Shatei Lam Mihngi ki ïakynduh,” la ong u samla Marngar haba kren ha ka jingïalang thang mombati ba la pynlong da ka NESO bad ka Khasi Students’ Union (KSU) ha Khyndai Lad na bynta ban wanrah biang ïa ka suk ka saiñ ha Manipur.
Halor ka jingwan buhai shnong jong kiwei pat ki jaidbynriew kiba nabar ha ki Jylla bapher-bapher jong ka thaiñ, u la ong ba ka don ka jingma bad ka jingmynsaw haba kiwei pat ki jaidbynriew ba nabar kin ïoh leh trai khlieh ha ka thaiñ Shatei Lam Mihngi lada ki trai-ri trai-muluk kiba long ki nongshong shnong ba pura kin hap ban ïaumsnam para ma ki.
“Ngim kwah ban ïakren halor ki daw ïing ha katei ka Jylla (Manipur) hynrei ngi khmih lynti ba ki para trai-ri trai-muluk kin don noh ka jingïasngewthuh jingmut bad kin pynkut noh ïa kane ka jingïaumsnam namar khatduh-khatwai ngin hap sngewthuh ba ka don sa kawei pat ka jingma kaba ap ïa ngi ki trai-ri trai-muluk – ka jingwan rung kyrthep jong kiba nabar sha ki Jylla bapher-bapher jong ka thaiñ,” u la ong.
Ha kajuh ka por, u la pynpaw ka jingsngewkhia ba ka jingjia ha Manipur ka la ktah shi kat dei ïa ki samla kiba pule ha katei ka Jylla.
Ha kawei ka liang utei u samla nongïalam u la pynpaw ka jingsngewdiaw bad jingsngewlyngngoh ba u Myntri Rangbahduh ka ri, u Narendra Modi wat la u don por ban leit ai jingkren sha Amerika hynrei ym shym la ïohsngew wat tang shi kyntien ruh na u halor kaei kaba la jia ha Manipur.
“Kane ka wanrah ka jingpynartatien ïoh lehse ka dei kata ka rukom pyrkhat ban pynïaumsnam ban pynïatyngkhuh para ’riewlum khnang ba ki don da kawei pat ka jingthmu,” bynrap u President.
