Shillong, Jylliew 28:
Ka North East Students’ Organisation (NESO) ha ka Sngi Balang ka la ong ba lada ka Sorkar India kam lah ban pynsangeh ïa ka jingïakynad ha Manipur ka pyni ba ka don ïa ka ajenda kaba rieh da kaba shah ïa ka jingïakynad ban bteng ha katei ka Jylla.
“Ka Sorkar Manipur lem bad ka Sorkar Pdeng kim shym la lah ban tehlakam ïa kane ka jingïakynad bad ka Sorkar India wat la kam pyntreikam ïa ka ‘President’s Rule’ ruh, ka don palat 50,000 ngut ki shipai ha Manipur,” la ong u Chairman ka NESO, Bah Samuel B. Jyrwa haba kren sha ki lad pathai khubor hadien ka jingïalang thang mombati ba la pynlong da ka NESO bad ka Khasi Students’ Union (KSU) ha Khyndai Lad na bynta ban wanrah biang ïa ka suk ka saiñ ha Manipur.
U la ong ruh ba kane ha kawei ka liang ka la dei ban biang palat ban tehlakam ïa ka jingïakynad lada ka Sorkar ka kwah shisha ban wanrah ïa ka suk ka saiñ ha katei ka Jylla.
“Ngi sngew ba lada ym lah ban pynsangeh ïa kane ha kum kane ka por, ka pyni ba ka Sorkar India ka don ïa ka ajenda kaba rieh ban shah ïa kane ka jingïakynad ban bteng ha Manipur,” la ong u Bah Jyrwa.
U la bynrap, “Ngim tip ki ajenda aïu kita kiba rieh, hynrei ki lah ban don katto-katne ki saiñdur na ki bor ba nabar kiba buh jingma ïa ka bha ka miat jong ki trai-ri trai-muluk jong ki Jylla bapher-bapher ka thaiñ Shatei Lam Mihngi.”
Ka jingïakynad ha Manipur kaba la neh la jan 2 bnai mynta kam pat jai-jai ne sangeh bad ka NESO, kum ka seng kaba don ka jingkitkhlieh ka sngew ba ka la dei por ba ka suk ka saiñ kan wanphai ha Manipur.
“Ka long kaba lyngngoh ba hadien ba la ïoh ïa ki jingtip na ki nongshong shnong ka Manipur ba wat hapdeng ka jingdon jong ki bor ïada, na ka liang ka Sorkar Pdeng, kam lah satia ban pynsangeh ïa katei ka jingïakynad hynrei ka la nang bteng pynban na kawei ka sngi sha kawei pat,” u la ong.
Ha kajuh ka por, u la ong kane ka buh jingkylli ruh halor ka jinglah jong ki tnad ïada ban wanrah ïa ka suk ka saiñ ha katei ka Jylla.
Haba kylli halor ka jingsngap jar u Myntri Rangbahduh ka ri, u Narendra Modi, u Bah Jyrwa u la pynpaw ka jingsngewlyngngoh bad ka jingkyndit ba u Myntri Rangbahduh ka ri uba ju smat ban kren halor kano-kano ka mat kaba ktah ïa ka ri ne ki Jylla bapher-bapher (ka ri) u dang sngap jar haduh mynta wat la ka jingïakynad ha Manipur ka la jan dap 2 bnai kynthih.
“Ngi kyntu ïa u Myntri Rangbahduh ka ri ym tang ba un kren hynrei ban shim ki sienjam ki ban pynsangeh ïa ka jingïakynad bad ki ban pynbeit ïa ki jingeh kiba mih na kane ka jingjia,” u la ong.
Shuh shuh u Chairman ka NESO u la pynbna ba shen ka seng kan sa leit sha Manipur bad kan pyrshang ruh ban ïakynduh ïa ki nongïalam jong ka jaidbynriew Meitei bad Kuki.
“Ngi ngeit ba lyngba ka jingïakynduh bad jingïakren bad ki, ngin sa lah ban wanrah jingsuk ha katei ka Jylla,” u la ong.
Ha kane ka sngi la ïoh ruh ïa ka jingkren na u President ka KSU, samla Lambokstarwell Marngar bad u President ka Naga Students’ Union, Shillong.
