Shillong, Jylliew 28:
Ki nongkitkam shnong Mawsynram, East Khasi Hills District kaba la ïalam da u Bah Lastborn Shangpliang kum u Rangbah Shnong ki la pynshai ba ka shnong Mawsynram kam dei ka shnong ba shong u Ram kumba la batai stad da uwei u briew nabar ka jylla, hynrei ka dei ka shnong kaba la jer kyrteng ïa uwei u briew uba la wan shna ïing trep ha ka por ba ki leit ïew sha Bangladesh lyngba ka Hatmawdon.
Kane ka jingpynshai ka shnong Mawsynram ka dei namar uwei u briew nabar ka jylla u la batai ba kawei ka longkmie ka la ïathuh ba ka kyrteng shnong Mawsynram ka dei ba shong u Ram.
Kumta u Rangbah Shnong ryngkat ki nongkitkam ki la pynshai sha ki para shnong, ki para jaidbynriew ba katkum ka jingïathuh ki longshwa ka jingai kyrteng Mawsynram ka dei namar ki briew kiba sah shaneng ki ju leit ïew sha Bangladesh lyngba ka Hatmawdon.
Nangta, u la ïathuh ha kita ki snem ka shnong Mawsynram kam pat don shnong, hynrei uwei u briew uba kyrteng Synram u ju leit ïew sha Hatmawdon bad ynda u la wan phai na ka jingleit ïew u la shna ïing trep ha kawei ka jaka bad suki-suki ki briew ki sdang ban khot kyrteng noh ïa kane ka jaka sah Mawsynram kaba la neh haduh mynta.
Kumta u Rangbah Shnong u la pynshai ba ki paidbah kim dei ban sngap ïa ka jingbatai kulmar ki briew kiba nabar, hynrei ka shnong ka don la ki khana naduh ki por mynshwa.
