Shillong, Jylliew 28:
U Deputy CEM ka KHADC, Bah Pynshngaiñlang N Syiem u la ong ba ka Executive Committee kan nym shong tang ha ophis ban lum ïa ki kot ki sla haba ïadei bad ki jaka ha khappud, hynrei kan leit ruh sha ki paidbah khappud ban ïakynduh ïa ki khnang ban tip ïa ki jingshisha haba ïadei bad ka bynta jong ka Council na ka bynta ka jingpynbeit pud ha ka wat ba-ar.
Haba kylli halor ka jingkhlaiñ bor ka Council haba ïadei bad ki jaka kumba long ka Karbi Anglong Autonomous Council (KAAC) na ka bynta ka jingpynbeit pud, u Bah Pynshngaiñlang N Syiem u la ong ba ym dei ka Council kaba khlaiñ hynrei ki raid bad ki hima ruh ki khlaiñ bad ki trai khyndew ki khlaiñ.
U la ong ba ka paragraph 3 jong ka Sixth Schedule ruh ka kren shai haba ïadei bad ka khyndew, tangba kam mut ba ka Council ka long trai ïa ki jaka puta, hynrei ban pynïaid beit ïa ki kam lyngba ki raid ki hima, ka District Council ka kham khlaiñ bor. Kumta u la ong ba wat ka Sorkar Jylla ruh ka la buh khnang ïa ka District Council ha ka Regional Committee namar ki tip kham bha mano kiba dei ki trai khyndew bad ki hap ha kano ka raid ne hima bad ka District Council hi ka khlaiñ bor haba ïadei bad ka khyndew ka shyiap, bad kaba kongsan ka long ban pynbiang ïa ki kot ki sla khnang ba kin sngewthuh.
U Bah Pynshngaiñlang N Syiem u la ong ruh ba ka District Council ka la dei lypa ka dkhot ha ki Regional Committee kiba thaw da ka Sorkar na ka liang ka Council bad ka jingong jong u Symbud Myntri Rangbah ka Jylla, u Bah Prestone Tynsong ban pynphai biang ïa ki jaka sha Meghalaya kiba la pynhap sha Mikir Hills katkum ka Notification jong u snem 1951 ka long kaba dei bad kiba bun ki jaka ha Block-II ki hap hapoh ka jingpeit ka Hima Khyrim.
U la ong ba ka KHADC ka la don lypa ruh ïa ka Boundary Committee bad kan lum ïa ki kot ki sla ban pynbiang bad rah sha ka Regional Committee jong ka Sorkar Jylla.
