![Pynkynmaw u Dy CEM ïa ka VAB bad ki mat ka Jaitbynriew ki bym dei ban kren ha surok P-N-Syiem](https://unongsainhima.com/wp-content/uploads/2023/06/P-N-Syiem-jpg.webp)
Shillong, Jylliew 28:
U Deputy Chief Executive Member ka Khasi Hills Autonomous District Council (KHADC), u Bah Pynshngaiñlang N Syiem uba dei ruh u MDC ka Mawkhar – Pynthorumkhrah konstitwensi, u la ong ba ka Council kan shimkhia bha haba ïadei bad ka jingpynkylla ïa ka Khyrnit Bahynriew lane ka Sixth Schedule ha kaba u la pynkynmaw ïa ka bor ban pyllait ïa ki aiñ ka Sorkar Pdeng ban pyntreikam tang lyngba ka jingmynjur jong u Lat, hynrei hadien ka jingpynkylla ïa ka Sixth Schedule ha u snem 1972, ka bor ban leh kumta ka shong noh ha u President ka ri.
U la ong ba katkum ka Sixth Schedule, kino kino ki aiñ kiba dei jong ka Sorkar India ki bym ïahap bad ka jaitbynriew, ka bor ka shong ha u Lat ka jylla bad u Lat u lah ban pynduh ïa kano kano ka aiñ ka bym ïahap bad ka rukom im ki trai shnong.
U la ai nuksa ïa ki aiñ bapher bapher jong ka Sorkar Pdeng kiba kynthup ïa ka Forest Act nangta ka MMDR kaba ïadei bad ka jingtih ïa ki mar poh khyndew, ha kaba lada ym wanrah ïa ka jingpynkylla ban aibor noh ha u President ka Ri, u Lat ka Jylla u la lah ban pynsangeh ne pynduh ïa ki aiñ ka Sorkar India ba kin nym treikam.
Kumta u la ong ba ka Executive Committee kan sa peit bha khnang ba kano kano ka jingpynkylla kaba wanrah da ka Sorkar Pdeng ïa ka Sixth Schedule kan nym long ka jingduh jingmyntoi ïa ka jaitbynriew.
Haba kylli shaphang ka Village Administration Bill (VAB) kaba la wanrah da ka KHADC ha ki snem ba la leit noh bad kaba la sahteng khlem leh ei ei shuh, u Bah Pynshngaiñlang N Syiem u la pynkynmaw ba hadien ba ka VAB la poi sha ka Home Ministry ka Sorkar Pdeng ha kito ki snem, ka la don ka jingïakynduh bad ka Sorkar Jylla bad ha kato ka por, la don ba pasiaw ïa u ha kata ka jingïakynduh lang da kaba ong ba ka KHADC ka dei ban shim noh ïa ka VAB na ka Home Ministry.
Hynrei u la ong ba ha kato ka por kum u CEM u la ong ba kam dei ka kamram jong ka KHADC ban leh ïa kata, hynrei ka dei ka kamram jong u Lat ban pan noh ïa VAB na ka home ministry bad ban phah biang sha ka Council da ka khubor na u Lat halor kita ki 12 ne 18 tylli ki mat kiba ka Council ka hap ban pynshai.
Une u Dy CEM ba mynta ka KHADC, u la ong ba ki don ki mat kiba hap ban ïakren ha ka por kaba biang, bad u long uba la khreh ban ïakren badno badno halor ki mat kiba ktah bad kiba kongsan ha ki jaka kiba biang, ym ban ïakren ha surok ia ki mat ka Jaitbynriew, namar u sheptieng ïoh kan poi pynban sha khlaw.
Haba kylli halor ka jingong ban thung MDC ruh na kita ki ‘unrepresented tribe’, u Bah Pynshngaiñlang N Syiem u la ong ba ha ka jingsngew jong u, kito ki riewlum kiba shong ha Meghalaya ki la ïoh ban shim bynta ban jied ha ka ilekshon MDC. Kumno yn ong ba kim ïoh ban mihkhmat hangne ha Council haba ki la lah ban ïashimbynta ha ka ilekshon, namar ban thung MDC ka shong ha ka jingstad ka Sorkar, u Lat bad ki MDC ïano yn jied ban thung kum uta u nominated MDC.