Shillong, Risaw 20
Katba dangmih ki sngi, ka la ju ïai jia ka jingshah kawang petrol bom ha manla ki ophis Sorkar la ha kino-kino ki tnad treikam bapher-bapher, kaba ïa ki runar ym shym la lah ban ithuh durkhmat.
Ka jingbym lah ban ithuh durkhmat, kadei namar ba kine ki runar ba leit kawang petol bom, ki ju phong da ki mask ban kah ïa ka durkhmat jong ki.
Ïa kane ngi lah ban sakhi ba ha ka janmiet jong ka sngi Ba-ar, ka ophis Directorate of Employment and Craftment Training (DECT) kaba don ha ka thaiñ Keating Road, ka la shah kawang petrol bom ha ka por kumba 7:15.
Katkum ki tyllong khubor la ïathuh ba ar ngut ki briew ki bym pat lah ban ithuh durkhmat, kiba shong ha ka ar shaka, ki la kawang petrol bom sha phyllaw jong katei ka ophis.
La ïathuh ruh, ba u petrol bom u la hap bad sied hajan kawei ka dukan, ha kaba la kem ding ruh khyndiat ha ki plastik.
Shuh shuh la ïathuh ba mar ïa kawang, kine ki briew ki la phet krad na katei ka jaka, bad ki pulit ka East Khasi Hills ki la poi mar-mar ban pynlong ïa ka jingtohkit bad ban shim ïa ki sienjam kiba donkam.
Haduh mynta, ym pat don jingtip kaba thikna halor ka daw jong kane ka jingjia bad ka jingithuh ïa kine ki briew.
Ka jingtohkit ka dang ïaid shakhmat, ban lap ïa ka jingshisha halor kane ka jingjia bad ki briew ba donkti ha kane ka kam.
