Ka ‘Block Development Office’ ka dei kaba kongsan tam ha ka liang ki kam ki jam: Conrad

Rerapara, Risaw 20

U Myntri Rangbah ka Jylla, u Conrad K. Sangma ha ka Sngi Ba-ar u la plie paidbah ïa ka ïingmala bathymmai jong ka Rerapara Com-munity & Rural Develop ment Block (C&RD) ha ka jingdon lang ki MLA – u Subir Marak, Sanjay Sangma bad ka Mehtab Chandee A. Sangma.

Ha kane ka sngi, u Myntri Rangbah u la ai khublei ïa ka Aking Nokma jong ka Rerapara kaba la noh synñiang ïa ka jaka ban tei ïa ka ophis bathymmai jong ka ‘Block’ bad u la ai khublei ruh ïa ka bad ïa ki paidbah kumjuh kiba la ai kylluid mynsiem da ka jingsngewbha.

Ha kajuh ka por, u la buh ïa u mawnongrim na ka bynta ka surok AMPT (Garobadha sha Tura) bad plie ruh ïa ka jingkieng ha Samandalgre, Rerapara.

Haba ai jingkren ha kane ka jingïalang, u Myntri Rangbah u la ong ba ka ophis Block Development ka dei ka ophis kaba kongsan tam haba ïadei bad ka jingai jingshakri sha ki paidbah.

“Ka Secretariat ka lah ban dei ka ophis kaba ha khlieh duh, hynrei ha ka liang ka kam ka jam, kaba kongsan tam ka dei ka ‘Block Development Office’. Kiba bun ki skhim bad ki jingshakri paidbah la pyntreikam lyngba ka ‘Block’. Lada ki BDO bad ki nongtrei ki trei hok, kata ngi la lah ban pynbeit 75% na ki jingeh jong ki paidbah,” u la ong.

Haba pynkynmaw ïa ki jinglong-jingman kiba la leit noh, u la ong ba jan 70% ki ophis jong ka ‘Block’ ha ka Jylla ki treikam na ki ïing wai kiba rit khlem da don ïa ka jaka treikam kaba biang na ka bynta ki ophisar bad ki nongtrei.

“Kumno ki nongtrei kin treikam bha lada ym don ka jaka trei kaba biang? Haba ngi la ïoh ïa ka lad ban shakri, ngi la rai ban pynbeit ryntih ïa ka jingpynïaid kam bad ban kyntiew ïa baroh ki ophis jong ka ‘Block’ ha kylleng ka Jylla. Haduh T. 200 klur la mang na ka bynta kane. Ym shym don Sorkar kaba la leh ïa kane mynshuwa – ngi la sdang ma ngi,” u la ong.

U la bynrap ba ïa kum kine ki jingkylla la leh ha kylleng ki bynta – palat 2000 tylli ki ïingskul Sorkar la tei/pynthymmai, ki thanad kiba la pynbha, bad ki kolej kum ka Captain Williamson Sangma College ha Baghmara, Williamnagar College bad Nongstoiñ College la pynbiang ïa ki jingdonkam kiba bit ba biang.

Haba pynpaw ba u dei u Captain jong ka ‘Team Meghalaya’, u Myntri Rangbah u la kyntu ïa ki nongtrei Sorkar ba kin trei ha ryngkat ka jingsngewrit, ka jingshaniah, ka jinglong hok bad ka jingieid ïa ki paidbah kiba ki shakri.

“To buh nyngkong eh ïa ki paidbah ha ka jingtreikam jong phi,” u la ong.

U la pyntip ba ïa ki jingeh ba ïadei bad ka Rerapara la buh dak kum ki kam ba 1 bad 2 kiba hakhmat eh bad katkum kane, la sdang ïa ki jingïarap.

Ka surok AMPT (Garobadha-Tura) ka dei ka projek pynïasoh kaba kongsan bha na ka bynta ka Ri-lum Garo, katba ka jingkieng Rerapara ka dei ka bynta jong palat 100 tylli kiba kum kine ki jingkieng kiba la tei ha kylleng ka Jylla hapoh ka projek ba kyrpang ba la pynwandur da ka Sorkar ban pynïasoh ïa ki shnong ki thaw ba jngai.

Ha kane ka prokram la wan ïashim bynta lang ruh da ki Nokma, ki ophisar ka distrik, ki ophisar jong ka ‘Block’ bad ki nongshong shnong ka thaiñ.