Shillong, Risaw 20
Ka Executive Committee jong ka Dorbar Shnong Banglasohphie, ka la pynpaw ïa ka jingsngew-khia halor ka jingbym shimkhia ka Sorkar ban maramot ïa ka surok na Banglasohphie sha Thup-Thup, kaba la ktah ïa ki paidbah nongshong shnong.
U Sordar Shnong, u Bah Albinus Mawlong, ryngkat bad ki dkhot ka komiti bad u Secretary, ki la leit ban maramot hi ïa ka surok ha ka 20 tarik u Risaw 2026, ha ka por 7:30 baje mynstep, namar ka jingbym don ka jingmaramot na ka Sorkar Jylla.
Ka Dorbar Shnong ka la kyntu ïa ka Sorkar ban shimkhia mardor ban maramot ïa kane ka surok, khnang ban pynsuk ïa ka leit ka wan jong ki paidbah.
Ka la pynpaw ruh ba kane ka surok ka hap hapoh ka PWD Road Division Mawphlang, hynrei haduh mynta kam pat ïoh ïa ka jingmaramot kaba biang.
Ka Dorbar Shnong ka la ïathuh ruh ba ki nongshong shnong kiba sah ha kine ki thaiñ, ki shaniah ha kane ka surok bad ki shem jynjar khamtam ha ka por lyiur lada kin ïaid na kane ka surok, namar ka jingsniew palat.
Kumta ka Shnong ka la pynpaw, ba namar ka Sorkar kam shimkhia kim banse ban mih hi ban maramot ïa kane ka surok, tang ban suk ka leit ka wan ki paidbah nongshong shnong.
